VOV4.Jarai - Akan Leo, sa amăng hơdôm djuai akan sĭ mơdrô nua pơmă glăk hơmâo mơnuih ƀon sang tơring čar Lâm Đồng rông lông lăng amăng dơnao ia. Boh than ba glăi blung hlâo brơi ƀuh, akan Leo sit biă ñu dưi hơdip amăng ayuh hyiăng amăng kual Dap kơdư, čang rơmang amra pơhrui glăi hơmâo hmăi.

Ayong Trần Hữu Tự, ƀơi ƀut plơi Tân Hoá 2, să Lộc Nga, plơi prong Bảo Lộc, tơring čar Lâm Đồng lĕ sa čô mơnuih găn rơgao sui thun amăng bruă rông akan amăng dơnao ia mơnih anun lĕ akan rôphi, akan čep, akan trắm. Thun 2020, tui hăng tơlơi pơtô mơng ƀing mơnuih apăn bruă pơsur ngă hmua, ñu rông lông lăng akan Leo, sa amăng hơdôm djuai akan rông phrâo hăng mơnuih ƀon sang ƀơi kual čong čư̆. Hăng boh than ba glăi blung a brơi ƀuh, dơnao rông akan sang anŏ ñu lĕ anih rông akan Leo klă biă mă.

Hăng dơnao rông akan prong giăm 2 ar, blan 6/2020, sang anŏ ñu tă 2.000 drơi akan. Djuai akan yua kơ Anom bruă pơsur ngă hmua tơring čar Lâm Đồng djru, anom bruă djru brơi dong 70% mrô kam brơi kơ akan ƀong kah hăng pơthâo brơi boh thâo rông akan. Ayong Tự brơi thâo: “Akan Leo lơ̆m tă amăng dơnao mơng 7-8 gram sa drơi, kơtrâ̆o giăm 150 drơi akan amăng sa kĭ. Tơdơi kơ 10 blan rông, akah Leo mă sem lăng dưm dưm 1,4 kĭ sa  drơi, rông tui anai jing klă biă mă yơh”.

Tui hăng ayong Tự, akan Leo lĕ djuai akan hyu ƀong amăng mơmŏt mlăm. Lơ̆m dŏ anet, akan Leo ƀong kam lĕ lu hloh. Lơ̆m prong, akan Leo ƀong gơnam dŏ hơdip anun lĕ akan anet, hơdang …, rông amuñ biă mă hăng ƀă đuăi ƀă kman. Akan hơdip amăng atur ia, yua anun ăt dưi rông wŏt akan pơkŏn hơdip gah glông anun lĕ akan trắm, rôphi.

Ayong Tự brơi thâo, hlâo kơ tă akan, sang anŏ ñu rơmet agaih, sai vôi, kmơk kiăng kơ dơnao ia rơngeh hơdjă. Dơnao hơmâo wŏt măi hlong ia hơdjă - mut nao čroh ia Lộc Nga yua anun ia hơdjă hăng plih na nao. Yua anun yơh, akan Leo rông kar hăng anih hơdip amăng ia krông čroh hnoh, huăi hơmâo kman. Laih dong, ayong Tự ăt rông lu akan rôphi. Djuai akan rôphi hơdip ƀơi jơlah ia, lơ̆m akan rôphi mơboh čeh čar ană, anai lĕ jing gơnam ƀong brơi kơ akan Leo hơdip amăng atur ia.

Ayong Nguyễn Văn Thành, mơnuih apăn bruă mơng Anom bruă pơsur ngă hmua tơring čar Lâm Đồng brơi thâo, akan Leo ƀudah akan nheo lĕ djuai ania klĭ bor. Akan anai prong biă mă, ƀong jơman hăng hơmâo lu mơnuih kiăng yua anun ƀơi ia krông čoh hnoh arăng hyu mă lu biă mă ngă kơ akan leo hrŏ trun. Yua anun, Anom bruă hơmâo pơphun “Rông akan Leo amăng dơnao ia” kiăng kơ rông lông lăng sa djuai akan dưi pơhrui glăi hơmâo hmăi.

Hăng hơbô̆ bruă hơmâo pok pơhai, nua sĭ dưm dưm 90 rơbâo prăk amăng sa kĭ, lơ̆m pơhrui djop sang anŏ dưi pơhrui glăi 140-160 klăk prăk sa boh sang anŏ. Boh than ba glăi brơi ƀuh, sa, dua ƀon lan gêh gal amăng pơđĭ kyar rông akan Leo pioh sĭ mơdrô. Hơbô̆ bruă djru brơi mơnuih ƀon sang hơmâo dong djuai hlô rông kiăng kơ plih hĭ hơdôm akah rông hơđăp, mơng anun ngă kơ gơnam rông sĭ hơmâo nua ƀiă, jai djơ̆ hăng tơlơi kiăng mơng anih sĭ mơdrô gơnam amăng tơring čar Lâm Đồng.

Siu Đoan: Pơblang