Ră anai lu anih amăng ară jơlan mrô 28B găn nao să Phan Sơn, Tà Hine hăng Ninh Gia (tơring čar Lâm Đồng) hơmâo pơgiong amăng bruă pok prong, sa, dua ară jơlan pơphun tuh kơsu laih. Tui kĩ sư Nguyên Văn Thuận, pô wai lăng bruă man pơkra mrô 2, kiăng tañ, anom bruă hơmâo mă yua djop măi mok hăng mơnuih mă bruă, gir pơkra amăng hơdôm hrơi ư̆t hơjan.

“Anom bruă glăk pơtrut tañ 4 bơnah man pơkra jơlan hăng 2 bơnah tuh kơsu. Kiăng ngă tañ amăng hơdôm hrơi ayuh hyiăng gêh gal tui anai kiăng kơ ngă djơ̆ hăng hơnong pơkă”.

Akŏ bruă pơkra ming jơlan mrô 28B glông rơbêh 68 km, abih tih prăk tuh pơ alin rơbêh 1.400 klai prăk, yua anom bruă čuk pơkra jơlan Việt Nam ngă pô tuh pơ alin. Anai lĕ ring bruă phun, kiăng tơkuh nao rau dua kual bơwih ƀong Đà Lạt-Phan Thiết (glai rưng-ia rơsĭ), kơtưn pơlir kual hăng tañ ƀiă đuăi nao rai dua bơnah Ngŏ-Yŭ. Man pơkra mơng blan 4/2024, truh ră anai akŏ bruă hơmâo pơgiong rơbêh 40%: rơbêh 30 km tuh kơsu, 40 km tuh rang hăng giăm 58 km tuh pơtâo.

Ƀơi jơlan čun čoe Đại Ninh-anih pơkra tơnap hloh, 6 tơdrong tuai glăk pơkra. Ơi Trần Trung Hiếu, pô wai lăng man pơkra tơdrông mrô 3 (kông ti pơčruih ngăn 134 Việt Nam) brơi thâo, anih pơkra tơnap tap anun bruă pŏng gong, tuh lŏn rơngiă hrơi mông, samơ̆ anom bruă glăk pơpha mơnuih mă bruă tơhrơi mlăm kiăng tañ ngă djơ̆ hơnong pơkă:

“Gah yŭ lŏn pơtâo khăng, ngă tơnap tap amăng bruă khuer amăng, dưm nao gong, khuer tuh nao lŏn rơngiă hrơi mông. Truh ha mơkrah blan kah mơng giong bruă dưm nao gong, tuh lŏn. Bruă pơkra tơdrông ƀing gơmơi pơpha mơnuih mă bruă kiăng kơ pơtrut tañ hăng pơgiong djơ̆ hơnong pơkă. Ƀing gơmơi mă bruă tơhrơi mlăm, pơkiăo nao dong mơnuih mă bruă kiăng kơ pơgiong hăng jao lơ 15/12 pơ anăp”.

Tui tơlơi pơkă, akŏ bruă anai amra pơgiong amăng blan 12/2025. Samơ̆ yua hơjan hlim sui hrơi hăng gun amăng bruă pơhrui glăi lŏn ƀơi sa, dua bit anih ngă tơnap tui, bơdjơ̆ nao bruă man pơkra hrŏm./.