Ƀơi lu sang sĭ hơdrôm hră, gơnam yua hrăm hră pơar pơprong kah hăng Nhà sách Giáo dục ƀơi jơlan Lý Thường Kiệt, jơlan Hai Bà Trưng...tơring čar Dak Lak, ƀing amĭ ama čơđai sang hră hăng čơđai sang hră mut tơbiă blơi gơnam či yua hrăm hră lu biă mă, boh nik ñu amăng tlam mơmŏt hăng rơnuč hrơi kom. Lu mơta hơdrôm hră kah hăng hơdrôm hră anih 1, anih 6 hăng anih 10 arăng sĭ hăng blơi lu hloh. Sa čô amĭ  ama čơđai sang hră ƀơi phường Tân Lập kah pơpha tui anai:

“Djop mơta hră pơar pơ anai, hơdrôm hră hơgĕt hơmâo soh, hơdrôm hră hrăm, hơdrôm hră pơđok thim, pơblang ten tơlơi hrăm hơmâo soh. Rơnoh sĭ djơ̆ găl mơ̆n. Kâo kơnong čih anăn hơdrôm hră či kiăng blơi, mơnuih sĭ ƀơi sang bruă čih pơkra, in tơglit brơi arăng ruah mă, hơmâo mơtam hmar, tañ gêh găl biă mă”.

Kiăng pơhlom djop kơ anih anom sĭ mơdrô hơdrôm hră, kông ty pơčruh ngăn sĭ mơdrô hơdrôm hră hăng gơnam yua hrăm hră Dak Lak blơi pơmut truh 4 klăk per hơdrôm hră hrăm hăng rơnoh abih tih 45 klai prăk, rơbêh 1 klăk hơdrôm hră čih, giăm 4 klai prăk hăng 25 klai prăk blơi hră pơar bơwih amăng sang bruă, ƀirô či yua, wơ̆t hăng gai čih, gơnam yua pơkŏn pioh hrăm hră. Ơi Trương Văn Băng-Khua kông ty lăi:

“Kông ty bơwih brơi djop mơta hră pơar kơ čơđai sang hră. Ƀing gơmơi pơhlom brơi djop hră pơar, gơnam yua pơtô hrăm amra ƀu kơƀah ôh kơ sa thun hrăm phrâo”.

Hrŏm hăng anih anom sĭ mơdrô hơdrôm hră pơar, gơnam yua hrăm hră yak nao amăng thun hrăm phrâo. Djop sang hăng anih sĭ mơdrô bơwih brơi gơnam yua hrăm hră ƀơi phường Ƀuôn Ma Thuôt laih anun ƀơi djop să hơmâo prăp lui tañ laih, djop hơbô̆, rup rap hră pơar djơ̆ găl hăng phara ba sang hră či kiăng. Amai Nguyễn Thị Mỹ Trang, sa čô amĭ ama čơđai sang hră ƀơi phường Thành Nhất brơi thâo: Rơnoh sĭ mơdrô sum ao čơđai sang hră thun anai hơđong mơ̆n, đĭ trun mơ̆ng 180.000 truh 350.000 prăk sa per; sum ao pơrơguăt drơi jăn lĕ mơ̆ng 80.000 truh kơ 200.000 prăk sa per. Ñu lăi ruah mă sum ao arăng tơčoh lui hlâo, ƀu pơkă nao tơčoh sum ao phrâo ôh, kiăng pơkrem ƀiă prăk, laih anun sum ao hơmâo lu mơta arăng tơčoh lui hlâo djop laih.

“Kâo ba nao dua čô ană bă blơi sum ao, ƀơi sang sĭ mơdrô hơmâo laih sum ao arăng tơčoh lui hlâo hơmâo anăn sang hră anih gơñu hrăm anun, gêh găl biă mă. Hơbô̆ eng ao, bơnal, ia iom, rơnoh sĭ mơdrô djơ̆ lăp soh mơ̆n”.

Lăp đing nao hloh lĕ, thun anai gơnam bơwih brơi kơ thun hrăm phrâo hơmâo čih tong ten anih pơkra, anih tơčoh rơđah rơđong soh, ba sĭ mơdrô 70-80% anih blơi. Lu anăn gơnam Việt, hơmâo pơkra ming djop mơta hơbô̆  hiam, tŭ yua klă, rơnoh rơgêh mơ̆n, dưi hơmâo ƀing amĭ ama čơđai sang hră ruah mă blơi. Anai lĕ, kơnôl ƀuh rơđah boh tŭ yua amăng bruă jak iâu, mơnuih ƀôn sang Việt Nam, đing nao blơi gơnam dêh čar ta pô hlâo. Yă Phạm Thị Kim Anh, pô sang sĭ mơdrô sum ao čơđai sang hră anăn Bi Phạm, phường Ƀuôn Ma Thuôt, tơring čar Dak Lak brơi thâo:

“Amăng bơyan mut thun hrăm phrâo, sang sĭ mơdrô gơmơi pok bah măng mơ̆ng 6 mông mơguah mơtam kiăng kơ ƀing amĭ ama čơđai sang hră mut ĕp lăng či blơi. Gơnam sĭ mơdrô ƀơi lu sang pơkra ming pơprong amăng dêh čar pơkra rai hơmâo djop, lu mơta, hiam klă hăng hơđong mơ̆n. Ƀing gơmơi đing nao ĕp lăng tong ten jơlan mrai arăng tơčoh hiam kah blơi, djuai bơnal kơjăp hiam kiăng kơ čơđai sang hră buh mơak ha hrơi pơ sang hră”.

Hăng bruă mă prăp lui tong ten djop sang bruă sĭ mơdrô hơdrôm hră hrăm, sang bruă sĭ mơdrô eng ao kơ čơđai sang hră hăng glông bruă wai lăng sang sĭ mơdrô hơdrôm hră sa hơnơ̆ng amăng đơ đam dêh čar, hăng djop plơi pla, tơring čar, kah hăng ƀing amĭ ama čơđai sang hră hăng čơđai sang hră ƀơi Dak Lak hơđong yơh pran jua mut thun hrăm phrâo hăng lu tơlơi čang rơmang hiam klă hloh.