Hơmâo mă 2 Pri apah bơni hră pơhing tơring čar Dak Lăk hăng sa pri Hră pơhing Dap Kơdư amăng blan 6, hlâo kơ anun lĕ 4 pri kơ akŏ pơdong Ping gah hăng hla tui Wa Hồ hơmâo brơi lơ̆m akŏ thun, amai H’Kim Phúc Êban, đah kơmơi čih tơlơi pơhing djuai ania Êđê, glăk mă bruă pơ Hră pơhing Dak Lăk pioh glăi tơlơi lăp hơdor amăng khul čih tơlơi pơhing hăng hơdôm tơlơi čih kơ gru grua boh thâo hiam.

H’Kim Phúc ră ruai, kơ gru grua hiam, mơnuih mơnam hăng tơlơi phiăn mơ̆ng neh met wa djuai ania ƀiă lêng kơ pơhưč pran jua ñu mơ̆ng hrơi phrâo ngă bruă mơtăm. Rơbêh 12 thun čih tơlơi pơhing, yua thâo pơhiăp tơlơi djuai ƀiă anun ñu hyu hơduah ĕp tơlơi kiăng čih amuñ hloh, mơ̆ng anun hơmâo tơlơi čih phara, djru neh met wa dưi lăi pơthâo “tơlơi pơhiăp amăng pran jua” amăng bruă djă pioh gru grua:“Jing sa čô mơnuih hyu mă tơlơi pơhing phrâo djuai ania ƀiă jing kâo juăt nao biă pơ plơi pla. Thâo hluh gru grua tơlơi hơdip mơ̆ng gơñu jing kâo amuñ hơduah tơña, pơhiăp tom amuñ mơn, mơ̆ng anun neh met wa ăt mơak mơn lơ̆m ră ruai kơ gru grua wơ̆t hăng lăi pơthâo kơ tơlơi gơñu kiăng. Mơ̆ng hơdôm tơlơi čih kâo kiăng neh met wa thâo hluh dong amăng bruă djă pioh răk rem gru grua boh thâo hiam mơ̆ng djuai ania pô, hla tui mơnuih rơgơi bơwih bong, ngă bruă klă amăng mơnuih tơpuôl, gum akŏ pơjing tơlơi hơdip amăng plơi pla jai hrơi đĭ kyar hloh”.

Hrŏm hăng H’Kim Phúc, ƀơi Hră pơhing Dak Lăk, amai Nguyễn Hương Quỳnh ăt jing mơnuih juăt čih tơlơi pơhing gah gru grua mơn. Rơbêh 8 thun rơgao, ñu hơmâo dăp hră pơhing, pơkra lu tơlơi pơhing kơ gru grua djŏp djuai ania hăng hơmâo mă lu pri hră pơhing. Ră anai, ñu gơgrong bruă pơkra 2 črăn tơlơi pơhing kơ gru grua anun lĕ Gru hiam amăng tơlơi hơdip hăng Tơlơi hơdip mơak phrâo kual Dap Kơdư, pơtui rim blan sa wơ̆t. Yua dưi dăp hơdră wơ̆t hăng pôr pơhiăp hơdôm tơlơi pơhing ñu čih ƀơi anăp măi kuai, hơdôm tơlơi čih mơ̆ng ñu hơmâo tơlơi pơplih phara. Tui hăng amai Quỳnh, sit gru grua phara mơ̆ng 49 phung djuai ania ƀơi Dak Lăk yơh ngă pơhưč kơtang, jai mut ĕp jai ƀuh tơlơi čih mơak, pơhưč mơnuih hmư̆:“Lơ̆m nao mă bruă pơ plơi pla, mut amăng tơlơi hơdip neh met wa djŏp djuai ania ƀiă, kâo hơmâo thâo lu tơlơi klă biă, laih anun bơni glăi pô lơ̆m ruah bruă mă djơ̆ yơh. Lơ̆m čih kơ hơdôm tơlơi pơhing tui anun jing ngă pơhưč pran jua ta hloh laih anun lăng gru grua djuai ania ñu hiam biă mă, kiăng pôr pơthâo, pơƀuh hyu, khŏm pôr hyu kiăng rơnuk ƀing tha pơtô glăi kơ rơnuk čơđai tơdơi anai djă pioh hăng pơtrut tui. Dŏ gru grua lĕ dŏ lŏn ia, dŏ phun djuai”.

Lăng glăi mơ̆ng tơlơi hơmâo sit ăt jing hơdră mơ̆ amai Nguyễn Thảo, pô hyu mă tơlơi pơhing Hră pơhing Tiền phong, anih mă bruă ƀơi kual Dap Kơdư, djă pioh bơngăt jua ñu amăng rim tơlơi čih kơ gru grua đưm. Ñu ră ruai, giăm 10 thun ngă bruă, ñu ƀu anăm yap dong tah hơdôm tal ñu đĭ rơdêh thut hyu pơ anai pơ adih, nao ataih hơdôm pluh, hơdôm rơtuh km glăi pơ hơdôm boh plơi pla ataih ataih mơ̆ng tơring čar Dak Lăk hăng Dak Nông či bưp ană plơi, mơnuih kơhnâo. Rim wơ̆t nao mă bruă ngă kơ ñu jê̆ giăm hloh hăng ayuh hyiăng glai klô, kual lŏn hăng pran jua hiam mơ̆ng ană plơi. Gơñu glăk gir djă pioh, răk lui gru hiam amăng tơlơi hơdip phrâo, kiăng pơjing rai sa kual hơmâo lu gru grua hiam phara:“Čih tơlơi pơhing hơget tŭ mơn ta khŏm nao pơ plơi pla kah mơ̆ng thâo rơđah tơlơi hơdip anai hiư̆m pă. Samơ̆ hăng gru grua - jing bruă phara hơjăn, kơnong kơ mơnuih khăp hăng hor biă mă kah mơ̆ng gir hyu hơduah tơña, thâo hluh mơ̆ng tơlơi ră ruai, lăng amăng ƀô̆ mơta mơ̆ng rim čô ta bưp, rim tơlơi ta ră ruai. Khŏm khăp kah mơ̆ng thâo hluh pran jua ƀing glăk djă pioh hăng răk lui gru grua, mơ̆ng anun kah mơ̆ng thâo pôr hyu kơ pô pơkŏn”.

Ƀu kơnong pôr pơhing đôč ôh, ƀing čih tơlơi pơhing gru grua ăt djru akŏ pơdong hăng đĭ kyar gru grua amăng mơnuih tơpuôl. Ƀơi Dak Lăk, anih hơmâo lu gru grua hiam mơ̆ng 49 phung djuai ania, ƀing hlăk ai čih tơlơi pơhing glăk pik ia iŏm hiam tui kơ gru grua Dap Kơdư. Hăng pran jua hor kơ bruă, ƀing đah kơmơi čih tơlơi pơhing glăk bang hyu anŏ yôm, râu mơdưh tơlơi pơmin pran jua djă pioh gru grua hiam mơ̆ng djuai naia, djă pioh gru hiam kjăp phik mơ̆ng plơi pla./.