Klâo bôh sang anô̆ dưi djru prăk pơdŏng sang dô̆ lĕ sang anô̆ ƀing tơhan rơka ruă Lê Văn Phúc, ƀơi thôn 12, să Ea Rvê; Nguyễn Văn Minh, ƀơi thôn 13, să Ea Lê; hăng Y Blưng Hra, ƀơi ƀôn A1, tơring kual Ea Sŭp. Abih bang prăk mă yua djru rim bôh sang lĕ 100 klăk prăk. Amăng anun, Phun akha sang bruă apui lơptrik kual Tŏng Krah dêh čar djru 60 klăk prăk, tơring glông Ea Sŭp djru 30 klăk prăk mơ̆ng ngăn rơnoh Keh prăk hơdor tơngiă, gong gai hơdôm bôh să djru 10 klăk prăk.

Hrŏm hăng anun, hơdôm bôh sang anô̆ dô̆ djru dong prăk pioh pơdŏng sang phrâo klă hiam. Amăng hrơi jao sang, anom bruă apui lơtrik Dak Lak ƀơk brơi rim sang anô̆ sa anung gơnam nua ñu 5 klăk prăk pioh blơi prăp dong hơdôm gơnam mă yua amăng sang. Hlâo kơ anun, ăt mơ̆ng ngăn rơnoh djru mơ̆ng Phun akha sang bruă apui lơtrik kual Tŏng krah dêh čar, anom bruă apui lơtrik Dak Lak hmâo pơdŏng laih 2 bôh sang hơdor tơngiă djru hơdôm bôh sang anô̆ gah hơdră bruă ƀơi tơring glông Buôn Đôn, tơring čar Dak Lak./.