Kual čư̆ siăng Khánh Sơn, Khánh Vĩnh hmư̆ hing hăng lu đang pla boh sầu riêng, măng cụt, mit Thái, boh ƀơr, pơtơi. Sit biă ñu, sầu riêng Khánh Sơn hơmâo ba sĭ mơdrô lu, jing gơmơi ba glăi pơhrui lu brơi mơnuih ngă hmua. Hơdôm đang pla phun boh troh mơtah mơda, djop bơyan lêng hơmâo boh troh pĕ pơhrui, ƀu djơ̆ kơnong ba glăi gơnam pơhrui đôč ôh mơ̆ ăt lĕ “tơlơi gal bơwih brơi tuai čuă ngui” yôm phăn. Rơngiao kơ đang hmua pla boh troh, kual čư̆ siăng Khánh Hòa ăt hơmâo ia krông čroh hnoh, drai ia, glai rưng hiam mơtah mơda kiăng pơđĭ kyar bơwih brơi tuai čuă ngui amăng đang glai, plơi pla. Pơlir hăng tơlơi hơdip gru grua mơng mơnuih djuai ania Rahglai, Êđê, Tày, Nùng, anih dưi pơjing lu gơnam bơwih brơi tuai čuă ngui yôm phara anun lĕ mut hrŏm hrơi ngă yang rơbang, ngui atông čing, tơnă bơnai gơnam ƀong djuai ania, dŏ amăng homestay sang liang. Amai Nguyễn Thị Thu dŏ amăng plơi prong Nha Trang lăi pơthâo tơdơi kơ ñu nao čuă ngui să kual čư̆ siăng Khánh Sơn:

“Sang anŏ gơmơi thun anai nao ngui pơ Khánh Sơn dua wŏt laih. Ƀơi anai lăng hyu jum dar hiam, ayuh hyiăng rơ-ơ̆. Boh troh amăng thun anai mơboh hơmâo măng cụt, sầu riêng glăk amăng bơyan pĕ pơhrui. Rơngiao kơ ƀong boh troh, sang anŏ gơmơi ăt nao ngui pơ drai ia Tà Gụ, lăng truh drai ia hiam, rơ-ơ̆ biă mă. Lu kyâo pơprong mơtah mơda ngă rơ-ơ̆. Mơnuih ƀôn sang jê̆ giăm, djru brơi gơmơi djop mơta”.

Ơi Nguyễn Trí Dũng, kơ-iăng Khua Jơnum min mơnuih ƀôn sang să Tây Khánh Sơn brơi thâo, amăng să hơmâo sa, dua boh sang anŏ pơplih hơbô̆ bruă bơwih ƀong, tơnă hơbai gơnam ƀong, ba hyu tuai čuă ngui amăng đang hmua, plơi pla.

“Amăng să Tây Khánh Sơn hơmâo tơlơi dưi lĕ hơmâo đang hmua pơprong, amăng anun anih jum dar lăng hiam, ayuh hyiăng rơ-ơ̆, ngă gêh gal brơi kơ tuai hyu čuă ngui, blơi yua gơnam yôm phara ƀơi Khánh Sơn kah hăng añăm ƀong mơng kual čư̆ siăng. Mơng anun dưi pơhưč lu tuai čuă ngui, laih dong pơgôp blơi pơhrui gơnam đang hmua brơi neh met wa”.

Kiăng tŭ mă tŭ yua, tơring čar Khánh Hòa kiăng dưm dăp kual bơwih tuai čuă ngui amăng ƀon lan pơlir hăng bruă ngă hmua, ruah gơnam phun anun lĕ sầu riêng Khánh Sơn, boh pơ-ô̆ Cam Lâm, boh kruăi bưởi Diên Khánh. Mơnuih ƀôn sang hơmâo pơsur pơlir hơbit bơwih ƀong hrŏm kiăng hrưn đĭ klă amăng bruă bơwih bơwang. Tơring čar ăt kiăng tuh pơ alin man pơdong anih anom, djru pơdong homestay, anih čuă ngui, laih dong pơtop hrăm brơi tơlơi bơwih brơi, pơblang brơi, hrăm tơlơi gah rơngiao brơi neh met wa. Yôm ƀiă dong lĕ pơlir tour čuă ngui, pơjing glông ba hyu “bul pơtâo ia rơsĭ Nha Trang-đang pla boh troh Khánh Sơn-anih gru grua Khánh Vĩnh”, pơlir hăng lăi pơthâo amăng plang internet hăng hluai tui anom bơwih brơi tuai čuă ngui kiăng pơhưč lu tuai. Ơi Nguyễn Duy Quang, Khua gơnong bruă ngă hmua hăng ayuh hyiăng lŏn mơnai tơring čar Khánh Hòa brơi thâo:

“Tơdah hơdôm kual čư̆ siăng ră anai pla lu djuai phun kyâo boh troh hăng pơlir hơbit bơwih brơi tuai čuă ngui amăng đang hmua amra pơlir anih tuai čuă ngui kiăng pơđĭ kyar gơnong bruă tuai čuă ngui amăng tơring čar Khánh Hòa. Tuai čuă ngui amăng đang hmua pơlir hăng hơdôm anih rông hlô hăng gơnam OCOP amra hrưn đĭ tơlơi hơdip kơ neh met wa. Lơm anih čuă ngui pơlir hơbit mơng kual ia rơsĭ truh pơ čư̆ siăng amra hơmâo lu dong gơnam OCOP, plơi pla pơkra gơnam, anih rông hlô, ba glăi tơlơi pơsur amăng pơđĭ kyar tuai čuă ngui kơñ pơgi”.

Hăng tơlơi gal mơng lŏn mơnai glai čuă, đang pla boh troh mơboh hăng gru grua yôm phara, Khánh Hòa glăk dong ƀơi anăp kơ tơlơi dưi kiăng pơplih phrâo rup rap tuai čuă ngui, ƀu djơ̆ kơnong bong glăi tuai ƀơi bul pơtâo đôč ôh ăt wŏt hyu čuă ngui amăng glai rưng mơtah mơda, jê̆ giăm hăng phara. Čuă ngui amăng plơi pla tơdah dưm dăp klă, pơđĭ kyar hơđong amra jing “glông jơlan” ba tuai hyu pel ĕp dơlăm gru grua hăng đang hmua, glai čư̆ ƀơi Khánh Hòa, ngă pơtrut phrâo amăng tơlơi bơwih ƀong ƀơi ƀon lan./.