Đĭ pơhiăp amăng mông bưp, Khua Jơnum min djop djuai ania mơnuih mơnam Việt Nam Đỗ Văn Chiến mơ-it nao tơlơi pơpŭ bơni gơyut gơyâo jar kmar hơmâo dong yua, pơgôp amăng bruă pơklaih rơngai, pơlir hơbit lŏn ia, pơjing hăng wai pơgang lŏn ia Việt Nam. Dêh čar Việt Nam glăk gir run truh thun 2030 jing dêh čar pơđĭ kyar, tuh tia pơkra ming pơplih phrâo, pơhrui rĭm akŏ mơnuih đĭ lu, truh thun 2045 jing dêh čar pơđĭ kyar, hơmâo prăk pơhrui lu hloh.

Kiăng dưi ngă tui hơnong pơkă anun, ơi Đỗ Văn Chiến lăi pơtong, Ping gah, kơnuk kơna hăng mơnuih ƀôn sang Việt Nam čang rơmang amra tŏ tui tŭ mă lu ƀiă dong tơlơi đing nao, dong yua, djru brơi klă hloh, tŭ yua mơng gơyut gơyâo kar kmar amăng djop mơta bruă. Ƀrô tal anai, ơi Đỗ Văn Chiến hơmâo jao miđai giang mah hăng hră pơpŭ mơng Khua dêh čar brơi kơ hơdôm khul grup hăng ƀing mơnuih kiăng tŭ yap tơlơi dong yua hăng tơlơi gum pơgôp yôm mơng gơyut gơyâo jar kmar hăng Việt Nam.