Lơ 19/5/2024 lĕ sa hrơi amra ƀu wơr ôh hăng Y Jer Kpor, čơđai sang hră anih 12, sang hră gưl tlâo Nguyễn Bỉnh Khiêm, tơring glông Krông Pač, tơring čar Dak Lak lơm đĭ ƀuăn ƀơi anăp hla kơ Ping gah. Y Jer Kpor brơi thâo, hrơi blan pel ĕp gru grua Ping gah, kơ gru hơdip mơng mơnuih apăn bruă Ping gah ngă hơkrŭ hăng dong amăng ƀing mơnuih mut Ping gah, Y Jer jai pơ-ư ang, gir run pơhrăm ñu pô, jing mơnuih hơdip hiam klă, mơnuih mut Ping gah ba gru kiăng djru brơi plơi pla ala ƀon.

“Kâo čô čơđai sang hră, jing mơnuih phrâo mut Ping gah, yua anun blung hlâo kiăng pơhrăm ta pô kiăng jing sa čô mơnuih Ping gah klă ƀiă dong, kiăng tơdơi anai thâo mơbruă amra pot glăi pơ plơi pla, djru pơđĭ kyar bơwih ƀong huă, gru grua hăng lui hĭ hơdôm bruă soh glăi bơbeč sat nao plơi pla”.

Ăt pơ-ưng ang lơm dưi mut Ping gah ƀrô tal hơdor glăi 134 thun hrơi tơkeng Khua mir sir Hồ Chí Minh, lơm dưi mut hrăm sang hră gưl prong Đại học Kinh tế Hồ Chí Minh, Trần Phan Tường Vy ăt ƀu hơgŏm tơlơi hok mơ-ak hăng pơ-ư ang. Tường Vy brơi thâo, bruă pơmut Ping gah ngă pơtrut pran jua ñu tŏ tui gir run, pơhrăm ñu pô amăng hơdôm thun hrăm gưl prong pơ anăp anai.

“Hơmâo pơmut Ping gah Cộng sản Việt Nam, kâo pơmĭn kâo pô kiăng gơgrong ƀiă dong, lơm jing sa čô mơnuih Ping gah amra pơtrut pran jua kâo gir run rĭm hrơi, kiăng jing sa čô mơnuih hơdip klă ƀiă dong, kiăng djru brơi plơi pla lŏn ia”.

Tui nai Nguyễn Thị Mai Phương-Kơ-iăng khua git gai Ping gah, Kơ-iăng khua sang hră gưl tlâo Nguyễn Bỉnh Khiêm, tơring glông Krông Pač, tơring čar Dak Lak, hơdôm thun giăm anai, bruă pơmut amăng Ping gah hăng ƀing čơđai hrăm hră hơmâo sang hră đing nao hăng ba glăi tŭ yua. Mơng thun 2020 truh ră anai, sang hră hơmâo pơmut Ping gah brơi 19 čô čơđai sang hră hơdip ba gru, hrăm hră rơgơi.

“Mơng thun 2019 Khul pơphun Ping gah tơring glông hơmâo črâo ba bruă pơmut Ping gah hăng ƀing čơđai sang hră, khul apăn bruă Ping gah gơmơi hơmâo đing nao bruă anai hăng ƀing gơmơi ba tơbiă hơnong pơkă sa čô čơđai dưi lăi pơthâo kiăng pơtô hrăm jing mơnuih Ping gah kiăng kơ hơmâo hơdôm tơlơi anai, anun lĕ ƀing čơđai hrăm hră rơgơi, hơdip hiam klă. Lơm ƀing gơmơi hơmâo ƀing čơđai tui anun amra jao brơi Khul hlăk ai sang hră tŏ tui pơtô hrăm hăng brơi ƀing čơđai mut hrŏm hơdôm tơlơi pơplông kiăng pơƀuh lu tơlơi thâo thăi mơng ƀing gơñu”.

Rơwang thun 2020-2025 Ping gah tơring glông Krông Pač gir run pơmut 100 čô mơnuih Ping gah amăng hơdôm boh sang hră gưl tlâo hăng sang hră pơtô hrăm bruă mă-pơtô pơjuăt rĭse. Yap truh blan 6 thun 2024, Ping gah tơring glông Krông Pač hơmâo pơmut 83 čô mơnuih Ping gah phrâo lĕ ƀing mơnuih ba gru glăk hrăm hră ƀơi hơdôm boh sang hră gưl tlâo amăng tơring glông. Amăng anun, thun 2023 pơmut 25 čô čơđai sang hră; 6 blan akŏ thun 2024 hơmâo 29 čô čơđai sang hră hơmâo pơmut Ping gah. Ơi Trần Hồng Tiến-Khua git gai Ping gah tơring glông Krông Pač, tơring čar Dak Lak brơi thâo, bruă pơmut Ping gah amăng hơdôm boh sang hră jing hơmâo lu dong mơnuih mut Ping gah dŏ hlăk ai ƀơi tơring glông. Lơm nao jơnum pơƀut hrŏm amăng khul grup Ping gah amăng ƀon lan ƀing čơđai hơmâo gưl Ping gah tŏ tui čung ba, pơtô hrăm kiăng jing ƀing mơnuih hơdip ba gru:

“Bruă pơmut Ping gah ƀơi anai ƀu djơ̆ kơnong kiăng pơđĭ kytar khul apăn bruă Ping gah ƀon lan, tơring glông đôč ôh mơ̆ ăt kiăng pơđĭ kyar khul Ping gah. Ĕp pơmut mơnuih Ping gah lĕ ƀing ba gru, rơgơi hloh. Ră anai tơdah ƀing ta dưi ruah ƀing čơđai ba gru, hrăm hră rơgơi amăng hơdôm boh sang hră kiăng pơmut Ping gah, tơdơi anun pơthâo brơi hơdôm sang hră gưl prong tŏ tui gum djru brơi ƀing čơđai lĕ mơnuih Ping gah. Tơdơi anai lơm hră giong amra mut mă bruă amăng anih anom kơnuk kơna, ƀing ta amra hơmâo sa čô mơnuih Ping gah rơgơi tui ta kiăng”.

Bruă pơphun pơmut Ping gah amăng sang hră gưl tlâo ƀơi tơring glông Krông Pač, tơring čar Dak Lak jing pơdah bruă ĕp ƀuh, tŭ yap hơdôm tơlơi gir run mơng ƀing čơđai sang hră ba gru, hăng ngă gêh gal kiăng pơmut Ping gah lĕ ƀing hlăk ai, pơgôp hrưn đĭ klă dong mơnuih Ping gah hăng pơhrua mơnuih mă bruă phrâo, rơgơi brơi kơ Ping gah./.