Tui hăng tơlơi lăi pơthâo mơ̆ng mông Jơnum mơ̆ng Jơnum min mơnuih ƀôn sang tơring čar Dak Lăk pơphun tom brơi (8/9), truh lơ 28/8, tơring čar kơnong hơmâo brơi rơbêh kơ 3.939 klai prăk ngă bruă kơnuk kơna thun 2025, hơmâo 1/3 akŏ bruă. Hơdôm kơčăo bruă prong kah hăng jơlan rơdêh đuăi hmar Khánh Hòa - Buôn Ma Thuột, jơlan ter hang ia rơsĭ Phú Yên, Kual bơwih ƀong Dơnung Phú Yên, Kual sang măi Hòa Tâm, Tơdrun kom păn Bãi Gốc...lêng kơ hơmâo tơlơi tơnap amăng bruă ngă hră pơ-ar, čuk pơkra pok anih pơkra. Lơ̆m anun, lu kơčăo bruă gah rơngiao prăk kăk kơnuk kơna brơi kah hăng ƀut sĭ mơdrô - bơwih bơwang, hơdôm kual anih anom hiam, kual sang măi măi mok phrâo ăt kaih ngă mơn.

Ƀơi anăp tơlơi anai, ơi Tạ Anh Tuấn, Khua Jơnum min mơnuih ƀôn sang tơring čar Dak Lăk kiăng hơdôm gơnong bruă, tơring čar khŏm ngă bruă khut khăt pơtrut tañ brơi prăk ngă bruă kơnuk kơna pơtrun, lăng anai jing bruă yôm phun đah mơ̆ng dưi đĭ kyar. Hơdôm tơlơi gun gah lŏn tơnah, duh prăk, hră pơ-ar bơdjơ̆ nao anih anom ayuh hyiăng, man pơdong khŏm hơmâo pơƀut pơsir hlao amăng blan anai. Biă ñu, Khua jơnum min mơnuih ƀôn sang tơring čar Dak Lăk kiăng khut khăt ƀu brơi ôh ƀing gơgrong man pơkra mă bruă tơdu, ƀu dưi ngă, hŭi kơ kaih ngă, dŏ tơguan prăk, ngă tơdu trun bruă mă yua klă djŏp tơlơi gêh gal tuh pơ alin ring bruă kơnuk kơna ngă pô. Hrŏm hăng tơlơi kiăng pơtrut tañ brơi prăk ngă bruă, Jơnum min mơnuih ƀôn sang tơring čar Dak Lăk git gai lăng glăi, pơplih glăi hơdră tuh pơ alin ring bruă kơnuk kơna thun 2025, pơƀut  brơi prăk kơ hơdôm ring bruă dưi đĭ kyar, dưi hơmâo kơnuk kơna brơi prăk hloh, prăp rơmet bruă tuh pơ alin ring bruă pơkă thun găp ƀrô thun 2026-2030. Tơlơi kiăng lĕ pơplih rơđah amăng bruă man pơkra ring bruă yôm phun, ngă bruă tañ, kiăng dưi hơmâo rơnoh đĭ kyar rơbêh 10% amăng hrơi blan pơ anăp./.