Ƀơi mông jơnum khul khua apăn bruă ping gah tơring čar Dak Lak lok 29, Khua git gai ping gah tơring čar Dak Lak pơtrun hiăp djop gưl anom bruă ping gah,  sang bruă kơnuk kơna, hơdôm anom bruă dăp glăi, pơmut hrŏm kiăng pơhrŏ ƀiă mrô mơnuih ngă khua, apăn bruă tui hăng rơnoh pơpha bruă mă, kiăng ngă djơ̆ tơlơi pơtrun mơ̆ng gơnong dlông, djơ̆ hăng tơlơi thâo, tơlơi đăo kơnang, tơlơi hur har, glăm ba bruă mă mơ̆ng ƀing ngă khua; ngă pơgiong bruă dăp glăi, pơhrŏ mrô mơnuih amăng anom bruă kơđi čar lơ̆m tơring čar hlâo kơ lơ 20/2/2025. Hăng hơdôm anom bruă, sang bruă hơmâo pơhrŏ mrô mơnuih apăn bruă, dăp glăi tal, ăt jŭ yap glăi abih, pơhrŏ hĭ 15% čô mơnuih apăn bruă ngă khua djơ̆ hăng tơlơi pơtrun mơ̆ng gơnong dlông. Him lăng amăng rơwang hrơi tơjuh pơ anăp, tơring čar Dak Lak amra pôr pơthâo sit nik kơ bruă lăi pơthâo anăn mơnuih ngă khua, tañ jao bruă pioh pơphun mă bruă mơtam.

Ơi Nguyễn Đình Trung, Khua git gai ping  gah tơring čar Dak Lak brơi thâo,Ping gah, khul pơ ala mơnuih ƀôn sang, jơnum min mơnuih ƀôn sang tơring čar amra pôr pơthâo hră pơtrun pơpha bruă mă tơdơi kơ jơnum ƀing pơ ala mơnuih ƀôn sang tơring čar. Tơdơi kơ anun, pô ngă khua anom bruă, sang bruă kơnuk kơna hăng ƀing ngă kơ-iăng khom pơphun ngă bruă mơtam: Dăp glăi sang bruă, anih mă bruă, jŭ yap glăi prăk kăk, kông ngăn, anŏ tăm pong pơblih anăn sang bruă, anăn khua mua laih anun hlong tơgŭ mă bruă sit nik hăng sang bruă, anom bruă phrâo dăp glăi dơ̆ng mơ̆ng lơ 1/3/2025.