
Ƀơi anom bruă Khul wai lăng kơčăo bruă tuh pơ alin man pơdong tơring glông Čư̆ Mgar, mông mă bruă dik dăk amăng hơdôm hrơi ječ ameč hloh. Ơi Bùi Châu Lĩnh, Khua anom bruă Khul brơi thâo, ƀing apăn bruă khom ngă bruă wơ̆t amăng rơngiao mông mă bruă sit nik, hrơi năm, hrơi tơjuh ƀu pơdơi ôh kiăng hmao ngă pơgiong hĭ bruă jao hră pơar, mrô rơnoh čih pioh:
“Rơgao hơdôm thun ngă tui ring bruă mrô hră pơar čih pioh kơčăo bruă anai lu biă mă yơh, anun pơtrut pơsur juh alum pran jua ƀing adơi ayong mă bruă gir run hloh kiăng ngă giong bruă jao kơ abih bang”.

Ƀơi anih mă bruă sa bah amăng mơ̆ng Jơnum min mơnuih ƀôn sang tơring glông Čư̆ Mgar-anih mơ̆ tŭ mă hră pơar hăng pơsir hră pơ-ar kơnuk kơna, rơnoh hră pơar đĭ lu biă mă lơ̆m mơnuih ƀôn sang djop pô kiăng hneč mă mông ngă pơgiong hră pơar hlâo kơ gong gai kơnuk kơna či mă bruă dŏ glăi dua gưl, laih gưl tơring glông pơdơi abih bruă. Hrŏm hăng bruă khom ngă giong hră pơar truh hrơi pơkă, anih mă bruă sa bah amăng tơring glông dŏ pơtô brơi tum teč hơdră ngă tui hră pơar amăng črăn phrâo, lui truh mông djop să phrâo dưi mă bruă sit nik. Jơnum min mơnuih ƀôn sang tơring glông Čư̆ Mgar ăt prăp lui dăp glăi anih mă bruă hăng pơpha bruă mă djop, djơ̆ lăp kiăng huăi bơbeč djơ̆ amăng bruă bơwih brơi, ngă hră pơar brơi kơ mơnuih ƀôn sang. Ơi Nguyễn Công Văn, Kơ-iăng khua jơnum min mơnuih ƀôn sang tơring glông lăi pơtong:
“Hăng hơdôm bruă mă gah kơnuk kơna pơsir hră pơar lĕ, ƀing gơmơi git gai djop anom bruă, djop sang bruă tơlơi thâo amăng bruă khom pơtong rơđah bruă tơnap kiăng pơsir, khom lăi pơthâo, rơkâo đĭ hmao kru. Bruă hơgĕt dưi pơsir lĕ khom pơsir mơtam, hơdôm bruă aka ƀu pơsir ôh, kiăng thâo tong ten mơ̆n pioh kơ bruă tŏ tui pơ anăp, anom bruă phrâo tŭ mă pơsir hĭ tơlơi anun. Hăng hơdôm bruă mă, hră pơar pơdjơ̆ nao kơ lŏn tơnah, kông ngăn lŏn glai adai rơhuông mơ̆ aka ƀu hơmâo hră pơar pơtô brơi phrâo laih anun ră anai aka ƀu pơsir giong khom čih hră mơ-it lăi glăi hăng mơnuih ƀôn sang pô hră, anom bruă pô hră kiăng thâo laih anun djru kah pơpha hrŏm hăng tơlơi tơnap mơ̆ng tơring glông amăng hrơi blan hlăk bưp ră anai”.

Bơ ƀơi plơi prong Ƀuôn Hô, bruă dăp hăng pơphun glăi glong bruă kơđi čar, gong gai kơnuk kơna khom pơsir nao hrŏm hăng lu akŏ bruă pơprong amăng ƀiă hrơi blan đôč. Ơi Đặng Gia Duẩn, Khua Jơnum min mơnuih ƀôn sang plơi prong Ƀuôn Hô –brơi thâo, khua mua plơi prong đing nao kơ bruă mă glăm ba ƀơi hơdôm să phrâo anih či nao mă bruă, laih anun prăp lui git gai djop să, phường amăng plơi prong ră anai, kiăng hmao ngă rah bruă tuč rơnuč gong gai plơi prong, gưl tơring glông ră anai:
“Hlâo kơ pơđut gong gai kơnuk kơna gưl tơring glông mă bruă, biă mă ñu bruă yua prăk kăk, bruă pơpha mơnuih apăn bruă kơnuk kơna. Dua lĕ ƀing gơmơi hlăk ngă gêh găl đut tơhnal brơi kơ djop să, phường phrâo amăng plơi prong Ƀuôn Hô, hlâo kơ hrơi mông pơmut glăi, gơñu amra hơmâo anŏ gêh găl amuñ hloh kơ gơnam yua mă bruă, wơ̆t ană mơnuih hăng biă mă ñu kơ boh yom phun kiăng dưi pơphun tơgŭ mă bruă lông lăng hăng sit nik amăng lơ 1/7”.
Tui hăng akŏ bruă, lơ 25 hăng lơ 26/6, djop sang bruă gong gai phrâo ƀơi Dak Lak pơphun mă bruă sa amăng plĕ lông ngă hlâo. Lơ 30/6, tơring čar pôr pơthâo anăn anom bruă phrâo akŏ pơdong tơring čar Dak Lak phrâo hăng 102 boh sang bruă gong gai gưl să, phường. Tui hăng ơi Nguyễn Đình Trung, ding kơna apăn bruă ping gah dêh čar, Khua git gai ping gah tơring čar Dak Lak lăi, khom pơblih tơlơi pơmin dăp bruă hăng pơđĭ tui anŏ glăm ba, gơgrong phun amăng bruă mă, sa tơlơi pơtrun ječ ameč biă mă hăng ƀing ngă khua, mơnuih apăn bruă phrâo ră anai:
“Ƀing gơmơi mơ̆ng rim bruă glăm ba tum teč rơđah rơđong, khom pơblih nao hơdră či tơgŭ mă bruă ba mơtam kiăng dưi hmao hăng anŏ kiăng, djơ̆ hrơi blan pơkă kơ bruă jao. Mơnuih ngă khua, ƀing apăn bruă ƀơi să phrâo dưi pơkĕ hrĕ dăng kông pơtruh nao rai tơlơi pơhing hăng tơring čar, laih anun hlong dưi pơtruh nao rai hăng gơnong dlông dêh čar mơtam, yua kơ anun tơlơi thâo hluh glăm ba amăng bruă mă khom phara yơh. Anŏ kiăng kơ bruă mă kơđi čar pơkă kơ abih bang mơnuih ngă khua, apăn bruă, boh nik ñu ƀing khua mua phun gưl să, phường phrâo khom jĕ giăm mơnuih ƀôn sang, thâo hluh ană plơi pla hăng bơwih brơi bruă mă klă hloh anŏ kiăng mơ̆ng mơnuih ƀôn sang".
Viết bình luận