Ƀơi phường Ƀuôn Ma Thuôt, jơnum bưp nao rai lăi pơthâo jơlan hơdră, pơtruh brơi djop anom bruă sĭ mơdrô Dak Lak hăng dêh čar Khač, kiăng pơtrut dơlăm hloh bruă ngă hrŏm sĭ mơdrô gơnam đang hmua Viêt-Trung, biă mă ñu amăng bruă sĭ mơdrô boh durian (sầu riêng). Ƀơi mông jơnum, ƀing khua mua hơmâo pơčrong sai nao rai, pơblang rơđah anŏ či kiăng mơ̆ng anih anom sĭ mơdrô boh troh, añăm pơtam, biă mă ñu boh durian ba nao sĭ pơ dêh čar Khač. Thun 2024, rơnoh boh durian Việt Nam ba sĭ pơ dêh čar Khač 736 rơbâo tơn, đĭ hloh dua wơ̆t pơkă hăng thun hlâo kơ anun.

Tui hăng ƀing sĭ mơdrô gah dêh čar Khač, hrŏm hăng anŏ gêh găl mơ̆ng Hră pơkôl sĭ mơdrô bơwih ƀong hlom bom amăng kual “Glông mơtah” guai dêh čar Viêt-Trung djru mut tơbiă pơdŭ pơgiăng ba gơnam sĭ mơdrô tañ hloh, anŏ kiăng mơ̆ng mơnuih ƀôn sang ăt lu tui mơ̆n, sa tơlơi gêh găl mơ̆ng ƀing ngă hmua pla boh sầu riêng (durian), pơhlôm anŏ klă hơđong, hơdjă rơgoh laih anun boh ba sĭ mơdrô hơmâo na nao rim blan, djru pơtrut rơnoh pơđĭ kyar bơwih ƀong huă gah anom bruă Sầu riêng Việt Nam ba sĭ mơdrô ƀơi dêh čar Khač. Lu sang bruă, anom bruă mơdrô mơ̆ng Việt Nam kah pơpha hơdră mă bruă, ĕp anih sĭ mơdrô boh durian, sầu riêng. Lu khua mua pơdah rai pran jua kiăng, akŏ pơjing khul ngă hrŏm pla pơjing hăng sĭ mơdrô, pơhlom sir mơ̆ng bruă blung a truh pơ bruă ngă hrŏm kĭ pơkôl hơdor pioh kiăng hơmâo anih sĭ mơdrô hơđong, hơmâo anih či ba nao tong ten, rơđah rơđong. Ƀrô djơ̆ tal anai, khua mua pơ ala kơ lu sang bruă hơmâo kĭ hră pơkôl hơdor pioh bruă ngă hrŏm blơi pơmut hăng sĭ mơdrô boh durian. Khul sang bruă mơdrô ƀơi Dak Lak hrŏm hăng grup sĭ mơdrô mơ̆ng dêh čar Khač kĭ pơkôl akŏ pơjing anih bơlăi pơthâo gơnam sĭ modrô boh troh ASIAN pơdong ƀơi tơring čar Dak Lak.