Tơdơi kơ hmư̆ khua mua ping gah ƀôn prong lăi pơthâo, rơkâo kiăng hơmâo tơlơi git gai akŏ bruă pơkă hnơ̆ng, tơlơi pơgôp hiăp mơ̆ng djop sang bruă lăi nao akŏ bruă pơkă hnơ̆ng glăi, Ding jum kơđi čar pơtum nao bruă pơčrong sai hăng tŭ ư hơdôm jơlan hơdră, tơlơi kiăng amăng bruă pơprong, yôm sit pơkă hnơ̆ng glăi ƀôn prong Hồ Chí Minh. Klah čun ƀơi mông jơnum, Khua git gai ping gah, Khua mir sir ơi Tô Lâm pơtă pơtăn hơmâo hơdôm mơta tơlơi yôm kiăng đing nao.

Pơkă hnơ̆ng khom čih pơthâo tum teč rơđah rơđong, tui hăng jơlan hơdră, tơlơi pơtrun mơ̆ng Ping gah, hră pơtrun mơ̆ng khul apăn bruă ping gah, Ding jum kơđi čar, Khul apăn bruă git gai ping gah čih pơkra laih thun blan rơgao. Pơkă hnơ̆ng khom pơƀuh brơi rơđah tơlơi gơgrong ba, tơlơi dưi, bruă mă yôm phara mơ̆ng ƀôn prong Hồ Chí Minh, jing anih anom bơwih ƀong huă, gru grua hiam, pơtô pơjuăt, kơsem min boh thâo ia rơgơi amăng dêh čar. Ding jum kơđi čar rơkâo kơ anom bruă ping gah ƀôn prong Hồ Chí Minh pơtum bruă git gai, ngă tañ pơgiong hĭ akŏ bruă pơkă hnơ̆ng.