Lơ 11/9, ƀơi Ƀirô Ping gah, tui tơlơi git gai mơng Khua git gai Ping gah dêh čar ơi Tô Lâm, Ding jum kơđi čar mă bruă hăng Khul apăn bruă Ping gah Khua pơ ala mơnuih ƀôn sang dêh čar kiăng pơgôp hiăp amăng črăn hră pơtrun pơsit, bruă ruah mơnuih apăn bruă hăng bruă prap lui Jơnum Ping gah Khua pơ ala mơnuih ƀôn sang dêh čar tal I, rơwang thun 2025-2030. Amăng mông mă bruă, Ding jum kơđi čar lăng yôm črăn hră pơsit hăng bruă ruah mơnuih apăn bruă hơmâo Ping gah Khua pơ ala mơnuih ƀôn sang dêh čar prap lui tong ten, klă hloh, lăp djơ̆ hăng tơlơi pơkă hăng tơlơi črâo ba mơng gơnong glông; laih dong pơgôp hiăp tong ten kiăng pơhrua, pơgiong hră pơtrun pơsit Jơnum. 

Khua git gai Ping gah dêh čar ơi Tô Lâm lăi pơtong amăng rơwang pơ anăp, Ping gah Khua pơ ala mơnuih ƀôn sang dêh čar kiăng đing nao git gai bruă pơtrut pơjing Ping gah ngă bruă tơpă sit, hơđong kjăp djop mơta, pơplih phrâo jơlan gah git gai tui hơbô̆ bruă phrâo; gir run, ječ ameč ngă tui jơlan gah, tơlơi črâo trun, hơdră bruă, glông jơlan mơng Ping gah jing hơdră bruă djơ̆ tơlơi phiăn kiăng ngă tui sit nik. Khua git gai Ping gah rơkâo, đing nao git gai truh kih bruă ruah Khua pơ ala mơnuih ƀôn sang dêh čar tal XVI hăng khua mua Jơnum min pơ ala mơnuih ƀôn sang djop gưl rơwang thun 2026-2031. Git gai ngă tui klă bruă čih pơkra tơlơi phiăn; pơjing phiah phiăn lĕ “pơplih phrâo amăng pơplih phrâo”, pơsir hĭ tơlơi gun, jak iâu, pok phư ngăn rơnoh pơđĭ kyar lŏn ia.