
Plơi tuai čuă ngui Ta Lang, să Avương, ƀôn prong Đà Nẵng dŏ đŏm ƀơi akiăng jơlan Hồ Chí Minh hmư̆ hing. Tuai nao ngui pơ anai, kiăng dŏ glăi hyu ngui, nao pơ hmua, dlăng ia djuh amăng plơi pla. Hyu amăng glai klô pĕ añăm, wơ̆k rơbung, trun ia mă akan, hơdang, huăk areng laih anun ba glăi hơtŭk riă mă pô mơnong ƀong kah hăng amăng sang anŏ ană plơi pla laih anun truh tlam mơmŏt hmư̆ adoh, lăng suang, pĕ gông atông brô̆ gru grua đưm djuai ania Kơtu amăng sang rung sang gươl.

Ayong A Lăng Mit, dŏ ƀơi să Avương brơi thâo, mơnuih ƀôn sang djuai ania Kơtu hơdôm thun hlâo, kơnong tơki kơ bruă ngă hmua hang, anun tơlơi ư̆ rơpa, ƀu thâo tơtlaih ôh hăng ană plơi. Dơ̆ng mơ̆ng hơmâo bruă pơphun čơkă tuai nao ngui amăng plơi pla Ta Lang, sang anŏ ayong Mit ăt kah hăng lu sang anŏ pơkŏn amăng plơi, pơphun ngă bruă čơkă tuai. Thun 2018, ayong Mit dưi hơmâo kơnuk kơna djru brơi čan 40 klăk prăk, sang anŏ čan dơ̆ng prăk pơkŏn pơdong hăng pơkra glăi sang kiăng ngă anih čơkă tuai, homestay. Ƀign tuai kiăng dŏ glăi, đuăi hyu lăng hmua pơdai, glai klô lĕ sang anŏ ayong Mit hơmâo hơdră djru, bơwih brơi mă prăk apah djơ̆ lăp, tuai đih glăi amăng sang homestay ñu sa mlam ñu mă 100.000 prăk, sa čô tuai.
“Hrơi mông hơmâo ƀing tuai, ană plơi mơak biă mă, sang gơmơi hơmâo tuai dŏ glăi laih.Jai hrơi hơmâo pơđĭ kyar bruă tui hyu ngui dŏ glăi amăng plơi pla anun mơnuih ƀôn sang hơmâo hmăi prăk kăk. Tuai rai tơnă asơi hơbai añăm kơ tuai, mơnuih ƀôn sang hơmâo prăk. Hlâo adih kơnong ngă hmua sit ƀu djơ̆ bơyan hă ƀu hơmâo asơi huă dơ̆ng tah, ră anai ngă bruă čơkă tuai tơlơi hơdip mơda hơđong ƀiă laih”.

Plơi čơkă tuai Ta Lang,să Avương dưi hơmâo sang bruă pơđĭ kyar ASIA, kơčăo bruă Trường Sơn Mơtah yua anom bruă pơđĭ kyar dêh čar Mi djru laih anun Khul ngă bruă čơkă tuai Việt Nam gum hrŏm, pơphun jao glăi kơ plơi pla ngă bruă, bơwih brơi kơ tuai hyu ngui dŏ glăi mơ̆ng thun 2019. Mơ̆ng hrơi pơphun bruă mă, čơkă tuai, mơnuih ƀôn sang djuai ania Kơtu pơ anai, thâo hluh dơlăm hloh kơ bruă pơgang ayuh hyiăng lŏn mơnai glai klô kiăng ƀing tuai hor dŏ glăi. Plơi pla pơdong sang rung sang Gươl, pơtô hrăm kơ bruă hơtŭk riă tơnă hơbai asơi añăm rơgoh hơdjă huăi măt mơnong ƀong huă sit bơwih brơi kơ ƀing tuai. Kah hăng hơtŭk riă asơi añăm tui gru grua đưm djuai ania Kơtu, rŭ glăi bruă mă pĕ kơpaih mrai, rơwơi mơñam bơnal đưm hăng mrai ngă mă pô....Lư mơta gru gru grua hiam đưm adoh suang, suang tân tung, ya yă, pơhiăp pơtưh, adoh pơhrêng nao rai, pĕ gông atông brô̆, wơ̆t atông čing hơgor čơkă tuai kiăng mơak, ƀing tuai lăng hăng hor biă mă. Tuai hyu ĕp lăng glai kyâo pơprong đang Pơmu, glai kyâo sar, kyâo gơñum, glai hơmâo kyâo bơnga Đỗ Quyên dŏ hơnơ̆ng hnăi đôč amăng glai kmrơ̆ng, čư̆ čan. Ơi Mạc Như Phương, Khua jơnum min mơnuih ƀôn sang să Avương lăi:
“Bruă cơkă tuai amăng tơring blung a phrâo akŏ pơjing, amăng anun pok pơhai pơđĭ tui tơlơi thâo hluh mơ̆ng mơnuih ƀôn sang phara hăng hlâo. Mơ̆ng anun, tơlơi hơdip mơda mơnuih ƀôn sang ngă bruă čơkă tuai hyu ngui amra đĭ tui, djru hrŏm amăng bruă pơđĭ kyar bơwih ƀong huă, lui rơmŏn kŏn rin amăng tơring čư̆ siăng”.

Plơi tuai čuă ngui ĐhRồng să Đông Giang hơmâo 35 boh sang anŏ hăng 82 čô mơnuih mă bruă re se. Amai Briu Thị Hạnh, ding kơna Grup mram mrai đưm, plơi čơkă tuai Đhrôồng brơi thâo, hlâo adih, bruă mơñam mrai kơnong pioh yua amăng sang anŏ đôč, ră anai thâo pơjing rai gơnam sĭ mơdrô tuai blơi ngă anŏ djă pioh đuăi hyu ngui, mơ̆ng anun ană plơi pla hơmâo gơnam sĭ mơdrô, hơmâo prăk kăk tơlơi hơdip mơda plai ƀiă. Amai Hạnh lăi, sa blah eng mơñam mrai đưm sĭ hăng rơnoh mơ̆ng 800 rơbâo truh 1 klăk prăk, eng đut ƀiă 500.000 prăk, abăn băk ƀơi drơi mơdua lĕ 1.200.000 prăk. Rơngiao kơ bruă gum hrŏm bruă mơñam mrai đưm, amai Hạnh dŏ jing ding kơna hơtŭk riă tơnă asơi hơbai añăm laih anun khul adoh suang amăng plơi pla.
“Tuai hyu ngui tơña blơi ta sĭ, hlơi kiăng blơi eng ta sĭ eng, gơñu mut rai pơ sang ta či blơi. Khul hơmâo 35 čô adơi amai. Bơhmutu abăn băk amăng drơi jăn, akhăn băk tơkuai ta sĭ 250.000 rơbâo prăk sa blah anet, gơnam anai tŭ yap jing gơnam OCOP laih, ta ăt mơñam lu mơta akhăn pơkŏn kiăng arăng ngă gơnam djă pioh kah hăng mơñam kơdung băk, kơdung djă, kơdung dưm măi telephôn, kơdung dưm gai čih, lu mơta ra anăn yơh”.
Hơmâo hơdôm hơpluh boh plơi pla, ƀơi să kual čư̆ siăng amăng ƀôn prong Đà Nẵng pơđĭ kyar bruă tuai hyu ngui amăng plơi pla, hyu ĕp lăng hmua pơdai, glai klô čroh hnoh. Ƀôn prong Đà Nẵng hơmâo lu jơlan hơdră djru kơ plơi pla čơkă tuai kah hăng: Kơtưn bruă lir hơbit djop sang bruă mơdrô, kông ty ba tuai hyu ngui, ƀing ba hyu tuai, lăi pơthâo gru grua, pơtrut bruă mă pôr pơthâo amăng tơlơi pơhing, plang tơlơi pơhing facebook kiăng pơhưč ƀing tuai hyu ngui, djru hrŏm pơsir tơlơi bơwih ƀong huă kơ mơnuih ƀôn sang, pơđĭ tui rơnoh prăk pơhrui glăi kiăng hơđong tơlơi hơdip mơda, pơhrŏ ƀun rin kơjăp.
Viết bình luận