Tal ba hyu mơnuih mă bruă anai hơmâo 11 čô mơnuih apăn bruă mơng hơdôm gơnong bruă, sang bruă, glăi mă bruă pơ 11 boh să kual yŭ tơring čar. Tui tơlơi pơsit mơng Jơnum min mơnuih ƀôn sang tơring čar Gia Lai, hrơi blan mă bruă ƀơi să  mơng ƀing apăn bruă arăng pơkiăo nao mơng 3 truh pơ 6 blan.

Amăng hrơi blan mă bruă ƀơi hơdôm boh ƀon lan, ƀing apăn bruă kiăng lăi pơthâo bruă mă rĭm wŏt hrơi tơjuh, lăi pơthâo abih bang amăng rơnuč rơwang mă bruă, laih dong mut hrŏm pơtô hrăm brơi mơnuih apăn bruă ƀơi ƀon lan, pơgôp hrưn đĭ klă amăng git gai, wai lăng ƀơi să. Tui Khua git gai Ping gah tơring čar Gia Lai ơi Hồ Quốc Dũng, tơlơi pơsit anai lĕ tơlơi yak nao tong ten kiăng ngă tui tơlơi klah čun mơng Ding jum kơđi čar kiăng pơtrut pok pơhai hơbô̆ bruă gong gah 2 gưl, hrưn đĭ boh tŭ yua amăng bruă mă mơng anih anom kơđi čar ƀơi ƀon lan.