Tui anun, Khua Jơnum min mơnuih ƀôn sang tơring čar Gia Lai, ơi Phạm Anh Tuấn rơkâo djop anih anom ngă tui khut khăt hơdôm tơlơi črâo trun mơng gơnong glông hăng Ding jum prăk kak amăng bruă dưm dăp, mă yua klă anih anom mă bruă, pơhlôm brơi bruă mă hruaih mơng gong gai 2 gưl. Bruă pơhrui glăi gơnam rơbêh kiăng djơ̆ tơlơi pơkă, anăm brơi rơngiă, yua khưi khai; anăm brơi kiăo tui bong kjăp ƀơi anih anom mă bruă kơnuk kơna.

Tơdah kơƀah gơnam măi mok, hơdôm anom bruă dưi blơi pơhrua tui hơnong pơkă, laih dong đing nao bruă pơkra ming anih anom hơđăp kiăng ngă bruă. Jơnum min mơnuih ƀôn sang tơring čar Gia Lai pơtă bruă pơhlôm gơnam măi mok brơi anom bruă ngă hră pơ-ar, anih djă pioh hră pơ-ar, sang dŏ brơi ƀing apăn bruă tơdơi kơ pơmut hrŏm.