Ƀơi mông jơnum, khua mua tơring čar Gia Lai hơmâo lăi pơthâo jơlan hơdră đĭ kyar. Rơđah biă ñu, pơ Gia Lai Ngŏ (tơring čar Bình Định hơđăp), tơring čar pơƀut tuh pơ alin măi mok pơka gơnam, pơčeh phrâo măi mok; măi mok pơkra gơnam gru grua - tuai čuă ngui; pơđĭ kyar apui lơtrik pơkra phrâo, tơdrun kom păn hăng anom bruă logistics.

Bơ ƀơi Gia Lai Yŭ (Gia Lai hơđăp), amra pơđĭ kyar hơdôm kual pla sa djuai phun; pok pơhai tŭ yua pơkra apui lơtrik phrâo tui Hơdră prăp rơmet pơkra apui mrô 8; pơđĭ kyar Kual bơwih ƀong ƀơi bah amăng jang jar kmar Lệ Thanh, ngă pơhưč pơhrui gơnam mơ̆ng dêh čar Kur či pơkra, hơmâo nua gơnam hơđong.

Rơngiao kơ pơhưč tuh pơ alin, Gia Lai ăt pơƀut lăng glăi, pơsir brơi tơlơi tơnap kơ hơdôm kơčăo bruă ngă kaih, ngă brơi anih tuh pơ alin hơmâo arăng đăo kơnang. Ơi Phạm Anh Tuấn - Khua jơnum min mơnuih ƀôn sang tơring čar Gia Lai brơi thâo, anih tuh pơ alin phrâo glăk hơmâo pơplih mơ̆ng tơring čar truh pơ să:“Gia Lai gir pơplih anih tuh pơ alin klă hloh. Gơmơi jao rơnoh pơkă KPI nao pơ rim gơnong bruă, anom bruă hăng 135 boh să, phường. Hơdôm boh tơring amra sem lăng, pơplih phrâo hơdră wai lăng, mơ̆ng wai lăng jing bơwih brơi, lăng ană plơi hăng anom bơwih ƀong yơh phun - jing tuai či bơwih brơi mơ̆ng hơdôm anom bruă kơnuk kơna. Tơring čar khut khăt bơtơhmal mơtăm ƀing khua, mơnuih mă bruă kơnuk kơna ngă tơnap kơ bruă đĭ kyar hrŏm mơ̆ng tơring čar hăng pơgăn anom bơwih ƀong. Kâo čang rơmang hơdôm anom bơwih ƀong ăt hơmâo “bruă hơkrŭ” lăi biă, ngă biă hăng hơmâo boh tŭ yua biă”.

Nao pơhmư̆ mông jơnum, Nai prin tha Trần Du Lịch - Ding kơna Khul pơphô Hơdră mă yua Prăk kăk dêh čar lăi, tơlơi rơgơi mơ̆ng gong gai dua gưl phrâo jing pơhưč tuh pơ alin sit. Tơdah hơmâo tơlơi pơhưč tui anai, lu anom bơwih ƀong amra rai tuh pơ alin pơ Gia Lai:“Pơhrŏ ƀiă prăk jia, lui prăk jia lŏn tơnah jing yôm biă mă, samơ̆ tơlơi yôm hloh mơ̆ anom bơwih ƀong kiăng lĕ gong gai hơmâo anom bruă bơwih brơi pơplih phrâo klă hloh, gong gai yơh pô djru pơgang ba anom bơwih ƀong. Kiăng ngă hiư̆m pă, anom bơwih ƀong rai pơ Gia Lai bơwih ƀong tơpă sit, ƀu hŭi, ƀu bơngơ̆t ƀudah huăi tơnap hơget ôh”.

Ƀơi mông jơnum, Jơnum min mơnuih ƀôn sang tơring čar Gia Lai hơmâo brơi 69 tơlơi pơtrun tuh pơ alin, hră pơsit rơkâo tuh pơ alin hăng kĭ hră ngă hrŏm, hăng 4,7 klai dolar. Amăng mrô anai, hơmâo 27 kơčăo bruă hơmâo brơi hră tuh pơ alin hăng hră pơsit rơkâo tuh alin, hăng mrô prăk tuh pơ alin năng ai 26.400 klai prăk (dưm dưm hăng rơbêh 1 klai dolar Mi). Amăng anun hơmâo 13 kơčăo bruă măi mok, 14 kơčăo bruă man pơkra anih anom, kual sang măi; hơdôm kơčăo bruă apui lơtrik hăng Sang ia jrao.

Rơngiao kơ anun, 42 kơčăo bruă hơmâo kĭ pơkôl tui hră kĭ hơdor pioh tuh pơ alin, hăng mrô prăk tuh pơ alin him lăng rơbêh 93.400 klai prăk (dưm dưm giăm 3,6 klai dolar Mi). Anai jing mrô lăp hơdor biă mă, pơdah pran jua mơ̆ng anom bơwih ƀong kơ jơlan đĭ kyar mơ̆ng tơring čar; jing phun atur yôm kiăng pơplih bruă bơwih ƀong, pơkra gơnam hơmâo lu, klă hăng dưi pơhno. Hơdôm kơčăo bruă ngă hrŏm pơƀut gah apui lơtrik pơkra phrâo; tơjŭ pla hăng rông akan hơdang; pơđĭ kyar glai rưng pơmut hrŏm hăng rông rơmô, man pơkra sang măi pơkra gơnam mơ̆ng hmua. Yă Nguyễn Thị Lan Hương - Khua khul wai lăng Kông ti pơčruh ngăn pơkra hăng ba sĭ gơnam Việt Phúc, anih tuh pơ alin bruă ngă hmua mă yua boh thâo brơi thâo:“Gơmơi tuh pơ alin kual ngă hmua mă yua boh thâo phrâo ƀơi Čư̆ Sê. Anai jing kơčăo bruă hmư̆ hing gah bruă ngă hmua hăng hơdôm kual pơkra anah phun pla, wai lăng djă pioh djon djuai gen hăng kual mă yua boh thâo phrâo. Gơmơi čang rơmang kơčăo bruă anai pơtruh hăng boh thâo kĭ thuâ̆t rơgơi hloh, laih dong amra gum hrŏm hăng neh met wa amăng anom ngă ƀong hrŏm hăng neh met wa ngă hmua”.

Jơnum pơtrut pơsur Tuh pơ alin thun 2025 ƀơi Gia Lai ƀu kơnong pok rai lu tơlơi gêh gal ngă hrŏm hăng mrô prăk tuh pơ alin hơdôm klai dolar Mi đôč ôh, ăt pơsit tơlơi gir run mơ̆ng tơring čar amăng bruă pơjing anih anom tuh pơ alin rơđah rơđông, gêh gal hăng hơđong kjăp. Hăng jơlan đĭ kyar rơđah rơđông kơ rim kual, hrŏm hăng tơlơi gum hrŏm mơ̆ng gong gai dua gưl hăng khul anom bơwih ƀong, Gia Lai ƀơ ƀrư̆ pơsit tơlơi kơdrưh, hmư̆ hing jing anih hơmâo lu tơlơi gêh gal, anih hơmâo djŏp tơlơi či đĭ kyar mơtah, ngă hmua hăng boh thâo phrâo, pơkra gơnam hăng pơkra apui lơtrik phrâo. Anai jing tơlơi gêh gal yôm ba Gia Lai jing anih đĭ kyar phrâo mơ̆ng kual Dap Kơdư pơ anăp anai./.