Sang măi pơkra gơnam Dơnung Pleiku (să Bờ Ngoong, tơring čar Gia Lai) hơmâo Khua dêh čar pơsit tuh pơ alin mơ̆ng blan 9/2019. Kơčăo bruă prong giăm 200ha, prăk tuh pơ alin rơbêh 500 klai prăk, yua Grup sang măi pơkra kơsu Việt Nam ngă pô tuh pơ alin. Tơlơi gơñăm nao lĕ ngă giong črăn sa amăng thun 2022, hăng man pơkra anih anom bă kual sang măi amăng 5 thun. Khă hnun, truh ră anai kơčăo bruă ăt aka ƀu dưi ngă ôh yua aka ƀu ngă giong hră pơ-ar, pơplih glăi bruă čuk pơkra, pơkă hơnong.

Ƀơi mông nap pel ĕp phrâo anai, Khua ping gah tơring čar Gia Lai ơi Hồ Quốc Dũng kiăng pô tuh pơ alin khŏm pơkra giong anih pơđoh ia hơƀak hăng hơdôm ring bruă gah rơngiao amăng 4 blan, laih dong ngă hrŏm kjăp hăng hơdôm gơnong bruă, anom bruă kiăng pơtrut ngă tañ hloh. Ơi Lê Trung Kiên, Khua phun kông ti TNHH sa ding kơna Kơsu Čư̆ Sê - anom pơphun ngă kơčăo bruă brơi thâo:“Tơdơi kơ hơmâo tơlơi git gai mơ̆ng khua mua tơring čar, kông ti hơmâo mă tơlơi pơtô ba mơ̆ng Grup wai lăng Kual bơwih ƀong Gia Lai. Gơmơi amra pok pơhai ngă ring bruă gah guai sang măi, pơplih glăi kơčăo bruă tuh pơ alin lăp djơ̆ hăng tơlơi phiăn, laih dong kiăng tơring čar kĭ hră brơi tuh pơ alin hăng ječ ameč man pơkra đah mơ̆ng dưi mă yua”.

Ƀơi phường Pleiku, kơčăo bruă man pơkra plơi prong hơdjă agaih CK54 hơmâo pơsit jing “boh pơkhoă” kiăng pơtrut đĭ kyar plơi prong, laih dong jing tơlơi pơtrut pơsur prong biă kơ bruă tuai hyu ngui hăng bơwih bơwang. Kơčăo bruă prong 240ha, ană mơnuih hơmâo năng ai 17.000 čô, anăp nao đĭ kyar plơi prong ngă gru hăng anih anom phrâo, hơmâo tum pơƀut bruă sĭ mơdrô, pơtô hrăm, ia jrao, adoh suang ngui ngor hăng bơrơguăt drơi jăn. Ơi Đặng Toàn Thắng, Khua jơnum min mơnuih ƀôn sang phường Pleiku, brơi thâo, tơring glăk ngă hrŏm hăng hơdôm anom bruă bơdjơ̆ nao či ngă giong abih bang bruă đah mơ̆ng tañ man pơkra amăng hrơi ngă lơphet Akŏ pơdong kơnuk kơna pơ anăp:“Kual plơi pla hơdjă agaih hơmâo anih anom hiam CK54 dưi mă yua amra jing tơlơi pơplih prong, hmư̆ hing, jing boh pơkhoă djru đĭ kyar bơwih ƀong huă - mơnuih mơnam mơ̆ng tơring. Hơmâo ring bruă hmư̆ hing kah hăng tơdron pah golf 18 amăng bluh, anih sĭ mơdrô, sang čơ prong siêu thị blơi gơnam giăm 5ha, hơmâo đang bơnga dơnao ia, sang jưh tuai 5 asar pơtŭ, anih jơnum prong...Hăng anih anom hiam, adai rơ-ơ̆ djơ̆ biă či đih pơdơi, kơčăo bruă amra ngă pơhưč tuh pơ alin, tuai čuă ngui hăng hyu sem lăng”.

Ăt amăng tal mă bruă phrâo rơgao ƀơi hơdôm boh să phường gah Yŭ tơring čar, Khua ping gah hăng Khua Jơnum min mơnuih ƀôn sang tơring čar Gia Lai nao sem lăng ƀơi hơdôm kơčăo bruă prong kah hăng tơdron pah golf Đăk Đoa, anih tuai čuă lăng gru grua - plơi prong čuă ngui kơnua čư̆ đang glai kyâo hơngo Pleiku hăng ƀut sang jưh tuai - tơdron pah golf FLC ƀơi Đăk Đoa. Khua mua tơring čar Gia Lai git gai khut khăt hơdôm anom bruă, plơi pla ngă hrŏm đah mơ̆ng ngă giong hră pơ-ar či pơphun ngă hơdôm kơčăo bruă anai.

Bruă tơring čar Gia Lai gir ngă lu kơčăo bruă pơdơi hĭ mơ̆ng hlâo amra djru pok tơbiă abih tơlơi gêh gal pơ kual lŏn gah yŭ anai, jing kual đĭ kyar phrâo hăng pơđĭ tui boh tŭ yua bruă mă yua lŏn tơnah hăng bruă tuh pơ alin ƀơi tơring čar./.