Đĭ pơhiăp git gai ƀơi mông jơnum, ơi Phạm Anh Tuấn, Kơ-iăng khua git gai ping gah tơring čar, Khua Jơnum min mơnuih ƀôn sang tơring čar Gia Lai lăng yom hăng bơni biă mă ƀing tơhan kông an Gia Lai amăng bruă wai pơgang hơđon kơđi čar, tơlơi rơnuk rơnua kơ mơnuih mơnam thun blan rơgao, laih dơ̆ng rơkâo brơi abih bang ling tơhan ăt khom pơđĭ tui tơlơi gơgrong ba boh yom phun, gơgrong mă bruă ngă hrŏm djop sang bruă, khul grup, gong gai kơnuk kơna plơi pla pok pơhai ngă tui tŭ yua 5 khul bruă phun. Amăng anun, lăi pơtong tơlơi či kiăng thâo tong ten tơlơi pơhing ƀơi plơi pla, pơsir hmao kru hơdôm tơlơi soh sat či truh; khut khăt mơtam bơtơhmal djop tơlơi soh sat, ƀu lui pơjing rai hơmâo anih ngă soh phrâo, tơnap tap; ƀu lui ngă sư̆ rơbư̆, dŏ kơtuă amăng djop bruă ngă.

Ơi Phạm Anh Tuấn lăi pơtong:

“Abih bang amăng glông bruă kơđi čar ƀơi tơring čar khom pơđĭ tui tơlơi gơgrong ba, pơčeh phrâo, ngă bruă khut khăt, hmar hăng glăm ba amăng bruă pơgang tơlơi rơnuk rơnua kơ mơnuih ƀôn sang, djă kơjăp tơlơi hơđong amăng plơi pla, tơring čar, ngă atur kơjăp hloh mă bruă bơwih brơi kơ mơnuih ƀôn sang jai klă hloh. Ăt akŏ pơdong hăng pơđĭ tui boh tŭ yua amăng bruă jak iâu mơnuih ƀôn sang gum hrŏm pơgang tơlơi rơnuk rơnua dêh čar, pơđĭ kơtang pran jua ngă hrŏm amăng bang glông bruă kơđi čar wai pơgang tơlơi rơnuk rơnua, mơ̆ng anun ngă hrŏm sa bruă pơkơtưn kơdok kơdor hloh, tŭ yua brơi djop mơnuih ƀôn sang”.

Pơhiăp amăng mông jơnum, Thiếu tướng ơi Lê Quang Nhân, Khua kông an tơring čar Gia Lai brơi thâo: tal hyu suh mă ƀing soh sat anai lĕ, ngă tui tơlơi git gai mơ̆ng ping gah, jơnum min mơnuih ƀôn sang tơring čar Gia Lai hăng Ding jum kông an, pơdah rai pran jua khut khăt hloh amăng bruă kơđi čar kiăng pơgang tơlơi rơnuk rơnua kơ mơnuih ƀôn sang, pơgang hơđong lŏn ia, djru pơtrut pơđĭ kyar bơwih ƀong huă mơnuih mơnam ƀơi tơring čar.

Mơ̆ng ră anai truh blan 9, abih bang ling tơhan kông an amra ngă kơtang hloh hyu suh mă ƀing ngă soh sat, hŭi rơhyưt, ƀing ngă soh hơmâo khul, ƀing brơi čan prăk mă kơmlai lu, ƀing ngă bruă pơgang sang sĭ mơdrô tă tăn, ƀing sĭ mơdrô ma túy, ƀing klĕ dơ̆p, hyu plăk mă gơnam arăng, ƀing ngă soh kơ anih dŏ jum dar, bruă pơgang kông ngăn lŏn glai ča čot, mă yua boh thâo ia rơgơi pioh ngă soh.

Sa amăng hơdôm tơlơi phrâo lĕ bruă mă mơ̆ng kông an Gia Lai lĕ akŏ pơjing hăng pok pơhai brơi ling tơhan gum hrŏm lu khul tơhan hyu tir hơmâo 151 čô ƀơi 2 grup gưl tơring čar hăng 135 grup ƀơi să, ngă hrŏm hyu tir hăng ƀing tơhan blah ngă, hyu ĕp lăng djop anih amăng tơring čar.

Ƀing tơhan anai amra pơsir khut khăt hơdôm tơlơi ngă soh amăng plơi pla, ngă rung răng ană plơi kah hăng pơtum lu tơdăm đĭ rơdêh pơplông đuăi hmar, tơlơi soh ngă rung răng ƀơi jơlan glông hăng hơdôm anih juăt hơmâo tơlơi rung răng ƀôn prong. Thiếu tướng ơi Lê Quang Nhân lăi pơtong:

“Abih bang khua mua, ling tơhan kông an ăt kơđiăng na nao, ngă bruă hmar, kơsung blah, abih bang khom thâo gum pơgôp, tŭ ư hrŏm, gir run hloh găn rơgao tơlơi tơnap tap lông lăng, kiăng ngă giong bruă jao, hơdor pioh na nao tơlơi pơtô djơ̆, ba yua amăng mă bruă tui tơlơi tơpă yua kơ lŏn ia tơl wor rơbit drơi jăn pô, yua kơ mơnuih ƀôn sang khom bơwih, kơnuih hiam yơh anŏ yom pơphăn hloh. Abih bang amăng ling tơhan kông an tơring čar gir run na nao, pơđĭ tui tơlơi kơtang, ngă anŏ gơgrong phun amăng bruă pơhlom rơnuk rơnua, kiăng khom giong bruă jao”.

Tơdơi kơ ngă lơphet jơnum lu khua mua, ling tơhan pơdah thâo tơlơi hrăm taih, khul pơhrăm ngă kơjăp drơi jăn blah ngă, črăn hơdră pơdah rai tơlơi kơtang găng añrăng kah hăng pơsơi laih anun tơlơi pơmin tong ten prăp lui blah ngă khin hơtai mơ̆ng tơhan kông an mơnuih ƀôn sang. Ƀơi mông jơnum, kông an ăt pơphun ba yua lu mơta rơdêh mă bruă phrâo, rơdêh kơđuh khăng pơgang phao kơtang arăng pơnah, rơdêh git gai bruă hyu pơčruih apui ƀong sang, war pơgang barrie, rơdêh pruih ia kơtang, rơdêh hyu djru mơnuih amăng mông ječ ameč, rơdêh ba tơlơi pơhing, amra ba yua abih sit hơmâo tơlơi, blah ngă hăng pơklaih mơnuih ƀôn sang amăng mông ječ ameč prăp lui djop.