Tui anun, 56 kơčăo bruă hăng rơbêh 3.100 klai hơmâo jao: 4 kơčăo bruă (381 klai prăk) jao kơ Khul wai lăng tuh pơ alin man pơdong tơring čar hăng 52 kơčăo bruă (2.740 klai prăk) jao kơ hơdôm boh să, phường.

Rơngiao kơ anun, 34 kơčăo bruă hăng 667 klai prăk amăng jơlan hơdră dêh čar pơtrun, hrŏm hăng giăm 400 kơčăo bruă anet hlâo adih jao kơ tơring glông, plơi prong ră anai ăt jao glăi pơ să phường mơn ngă. Khua gơnong bruă prăk tơring čar Gia Lai ơi Trần Cang brơi thâo, bruă pơplih anai amra dăp glăi tơlơi gơgrong mơ̆ng pô wai lăng, jao bruă kơ să phường lu hloh, bruă brơi prăk tŭ yua hloh, pơlir hăng hơbô̆ bruă gong gai dua gưl. Ñu lăi pơtŏng: “Prăk brơi kơ să pơpă lĕ, jao kơ gong gai să anun git gai črâo bruă, pơphun ngă”, laih dong brơi să hơmâo djŏp tơlơi gêh gal akŏ pơdong grup wai lăng kơčăo bruă ƀudah apah anom apăn bruă djru ba./.