Tơdơi kơ dưm dăp, Ping gah tơring čar Gia Lai ră anai hơmâo 74 grup Ping gah hăng abih tih rơbêh 10.800 čô mơnuih Ping gah. Lăng glăi djop mơta boh than dưi ngă hăng anŏ aka ƀu klă amăng rơwang ngă bruă rơgao, Jơnum ba tơbiă hơnong pơkă pơtrut ngă bruă tañ amăng rơwang thun 2025-2030. Amăng anun, pơđĭ kyar GRDP rĭm thun rơbêh 10%; pơhrui rĭm akŏ mơnuih thun 2030 rơbêh 6.300 đôlar Mi, đơ đam tơring čar ƀu hơmâo sang anŏ ƀun rin; pơhrui ngăn drăp truh thun 2030 rơbêh 41.000 klai prăk hăng rơnoh sĭ mơdrô pơ tač rơngiao rơbêh 17 klai đôlar Mi.

Kiăng kơ dưi ngă tui hơnong pơkă ba tơbiă, Ping gah tơring čar Gia Lai pơsit 5 tơhnal phun kiăng pơđĭ kyar hơmâo: Đing nao bruă pơkra pơjing, apui lơtrik pơkra glăi, tuh tia pơkra ming mơtah, gơnam pơkĕ măi mok hăng AI. Ba bruă bơwih brơi tuai čuă ngui jing gơnong bruă bơwih ƀong akŏ phun hluai tui tơlơi gal mơng kual ia rơsĭ, glai rưng, gru grua. Anăp nao ngă hmua yua boh thâo phrâo, pla đang glai hơđong kjăp, pơjing hơdôm kual pla pơjing, bơwih ƀong pơprong amăng ngă hmua-tuh tia pơkra ming. Pơjing hơdôm kual logistics rôk tui jơlan mrô 19 hăng jơlan rơdêh đuăi hmar Quy Nhơn-Pleiku. Đĭ plơi prong tañ hăng hơđong kjăp, pơlir hăng bruă wai lăng lŏn mơnai.

Ơi Hồ Quốc Dũng, Ding kơna Ping gah gơnong glông, Khua git gai Ping gah tơring čar Gia Lai rơkâo Ping gah Jơnum min mơnuih ƀôn sang tơring čar gơgrong, gum pơgôp, pơplih phrâo amăng tơlơi pơmĭn, khut khăt amăng bruă mă kiăng găn rơgao tơlơi tơnap tap, tơlơi lông. Tơring čar kiăng đing nao ngă tui 6 bruă jao phun. Amăng anun, kiăng hrưn đĭ klă amăng pơphô bruă brơi Ping gah tơring čar, Khul apăn bruă Ping gah tơring čar amăng pơđĭ kyar bơwih ƀong huă-mơnuih mơnam, wai pơgang rơnuk rơnua hăng mut hrŏm jar kmar; ĕp lăng djơ̆ tơlơi gun kiăng hơmâo hơdră pơsir; đing nao jao trun prăk tuh pơ alin man pơdong, pơhưč tuh pơ alin gah rơngiao ngăn drăp, pơtrut ngă hrŏm kơplah wah kơnuk kơna-anom bruă mơnuih ƀôn sang ngă pô; man pơkra anih anom, jơlan glông ha amăng plĕ, pơlir djop kual; pơplih hơbô̆ bruă pơđĭ kyar pơlir hăng bơwih ƀong mơtah, bơwih ƀong rô nao rai, bơwih ƀong mrô; pơđĭ kyar ngă hmua yua boh thâo phrâo, pơkra pơjing, apui kơtrik pơkra glăi, tuai čuă ngui; pơhlôm djru tơlơi hơdip mơnuih mơnam, hrưn đĭ tơlơi hơdip mơnuih ƀôn sang, sit biă ñu kual mơnuih djuai ania ƀiă, kual ataih, asuek. Khua git gai Ping gah tơring čar Gia Lai ơi Hồ Quốc Dũng lăi pơtong:

“Rơkâo Ping gah Jơnum min mơnuih ƀôn sang tơring čar rơwang phrâo ječ ameč pơtô pơblang tơlơi pơtrun mơng Jơnum tơl abih bang mơnuih apăn bruă, mơnuih Ping gah hăng mơnuih ƀôn sang, pơjing jơlan hơdră bruă mă hăng akŏ bruă pok pơhai tong ten tui rĭm hơnong pơkă bruă jao. Pơsit tong hrơi mông hăng ngă rơnoh, hơmâo akŏ bruă kiăo tui lăng, pel ĕp, pơtrut pơsur na nao, hmao tlôn pơsir hĭ tơnap tap, gun găn, pơhlôm tơlơi pơtrun tañ mut amăng tơlơi hơdip, pơplih tong ten mơng hơdôm hrơi blan, rơwang ngă bruă blung a”.

Hăng gru grua gum pơgôp, pơđĭ kyar, pran jua pơplih phrâo hăng gir run ngă bruă. Ping gah Jơnum min mơnuih ƀôn sang tơring čar Gia Lai amra ngă tui tơlơi gơgrong phun, ba jơlan hlâo amăng pơplih phrâo amăng anih anom mă bruă; gir run ngă truh kih hơdôm hơnong pơkă, bruă jao mơng tơlơi pơtrun Jơnum rơwang thun 2025-2030, pơgôp pơjing tơring čar Gia Lai pơđĭ kyar tañ, mơtah, hơđong kjăp, jing tơring čar pơđĭ kyar kơtang amăng đơ đam dêh čar./.