Hơdôm hrơi laih rơgao, hơdôm anih ngă hră pơar bơwih brơi kơ bruă mơnuih ƀôn sang ƀơi tơring čar Lâm Đồng hơmâo tŭ mă hơdôm rơbâo pok hră, laih anun pơsir brơi giong truh 97%, dong tal 7 amăng dêh čar kơ bruă pơsir hră pơar mơnuih ƀôn sang. Kiăng mơnuih ƀôn sang ba nao hră pơar hăng djru pơsir brơi truh kih djơ̆ hrơi blan pơkă, gêh găl hloh, jơnum min mơnuih ƀôn sang tơring čar Lâm Đồng pơphun pơtô brơi bruă mă, sem glăi tơlơi laih găn rơgao kiăng 5000 čô mơnuih apăn bruă ƀơi anih ngă hră pơar kơ mơnuih ƀôn sang gưl să, pơsir tañ hră pơar lŏn tơnah yua ƀu hơmâo anŏ tăm pong; pơsir hĭ tơlơi tơnap dăng kông pơtruh nao rai tơlơi pơhing, mơ-it mrô rơnoh; akŏ pơjing 3 grup mă bruă mơ̆ng tơring čar nao djru ba ƀơi djop să, phường pơsir hĭ tơlơi dŏ gun, pok pơhai hmao kru bruă mă phun yom.

Ơi Hồ Văn Mười, Khua Jơnum min mơnuih ƀôn sang tơring čar Lâm Đồng brơi thâo, tơring čar hlăk ngă klă bruă dưm dăp ƀing khua mua kiăng gong gai kơnuk kơna dua gưl mă bruă tŭ yua hloh:

“Gêh găl phun kơ bruă mă anai lĕ tơlơi thâo hluh pơphun bruă mă gong gai kơnuk kơna dư gưl mơ̆ng tơring čar trun pơ să, phường, kual ngă bruă yom phara kiăng thâo rơđah rơđong tong ten, glăm ba prong anun yơh dưi găn rơgao hĭ tơlơi tơnap tap. Gơmơi ăt ngă hơđong bruă mă kơ ƀing khua mua, mơnuih apăn bruă. Bơmhutu hơmâo phường lĕ, hơmâo 2,3 čô mă bruă rơgơi gah boh thâo ia rơgơi samơ̆ hơmâo phường đơ đa ƀu hơmâo mơnuih thâo hruaih ôh. Hơmâo phường rai anai ƀing ngă bruă gah tơlơi phiăn ƀu hơmâo pô hlơi thâo, aka tom ngă tui ia rơgơi phrâo. Laih anun hơdôm tơlơi dơlăm amăng bruă lŏn mơnai tui hăng anun amra dưm dăp glăi mơnuih mă bruă kiăng bơkơnar ƀơi 124 boh să, phường, anih ngă bruă phara”.

Hrŏm hăng 5000 čô mơnuih apăn bruă ƀơi anih ngă hră pơar kơ mơnuih ƀôn sang să, tơring čar Lâm Đồng pơtum dơ̆ng 1.200 čô hlăk ai tơdăm dra nao pơ 124 boh sang bruă să, phường, anom bruă phara amăng tơring čar pioh djru gong gai kơnuk kơna ngă bruă pơsir hră pơar hăng ia rơgơi mrô. Ƀing hlăk ai pơyơr pran jua anun pơtô brơi mơnuih ƀôn sang gư̆ mă mrô pô hlâo nao hlâo, pô tơdơi nao tơdơi, čih anăn pơtong glăi amăng điện tử, čih anăn phrâo mơnuih ƀôn sang hơmâo anăn điện tử....Laih dơ̆ng, lăi pơthâo, pơblang rơđah hăng djru brơi tơlơi pơhing kiăng thâo kơ hơdră ngă hră pơar online.

Tui hăng ơi Buì Quốc Huân, Khua jơnum min mơnuih ƀôn sang să Lạc Dương, tơring čar Lâm Đồng, anai lĕ bruă mă yom hăng tŭ yua sit nik, djru hrŏm pơtrut bruă mă bơwih brơi kơ mơnuih ƀôn sang ngă hră pơar tañ, gêh găl hloh huăi rơngiă lu mông, wơ̆t hăng bruă mă pơ kual ataih, tŭ mă hră pơar mơnuih ƀôn sang djuai ƀiă, kual tơnap tap dŏ kơƀah tơlơi thâo thăi, gơnam mă yua boh thâo ia rơgơi mrô hăng thâo ba yua smartphone. Ơi Bùi Quốc Huân brơi thâo:

“Lơ̆m mơnuih ƀôn sang nao ngă hră pơar, lơ̆m hlăk ba yua ia rơgơi hăng điện tử, aka ƀu thâo hruaih lĕ hơmâo ƀing hlăk ai tơdăm dra djru ba. Kâo ăt git gai laih tơhan kông an să ngă hrŏm djru mơnuih ƀôn sang klă hloh, hlơi aka ƀu mut yua VneID lĕ pơtô ba gơñu. Hrŏm hăng anun, sem glăi mrô mơnuih mă yua telephon smartphone kiăng thâo hơmâo hơdră pơsir. Yom hloh lĕ lơ̆m mơnuih ƀôn sang rơkâo lăi pơthâo pơsir bruă ngă hră pơar hă, gơmơi lêng kơ djru ba soh djop tơlơi”.