Hrơi mut sang hră, 25 čô čơđai sang hră anih 1A, Sang hră gưl sa hăng gưl 2 Nguyễn Văn Trỗi, să Ia Mơ, tơring čar Gia Lai deng dong amăng sum ao phrâo. Ƀu dô̆ hling hlang dong tah, yua kơ mơ̆ng rơnuč blan 8, ƀing čơđai hmâo laih nai Hà Thị Hậu čơkă nao sang hră pioh ngă juăt hăng bruă nao hrăm hră. Mơ̆ng bruă hơđong anih dô̆, pel ĕp hơdrôm hră, hră čih, gơnam mă yua hrăm hră truh sum ao buh, ƀing čơđai amăng ƀrư̆ yak mut anih hrăm phrâo. Hăng ƀing čơđai sang hră ƀơi ataih, nai Hậu dô̆ gir run nao tơl sang pioh pơsur pran jua. Nai Hà Thị Hậu brơi thâo:

"Ƀơi anai, nai pơhrăm brơi čơđai kơkuh tơña bla, dŏ dŏng, pơhiăp klao, ngă tui tơlơi pơkă anih hrăm, hơdôm anăn lăi pơthâo, pơkă. Bơhmutu ñu, nai črâo nao rup vil lĕ ƀing čơđai kuar tơngan đĭ hăng dlông kơƀang; hrŏm hăng anun pơtă amĭ ama čơđai blơi hơdrôm hră, hră čih, prăp lui sum ao... Phrâo yak mut anih sa, ƀing čơđai dô̆ heng hong biă”.

Lơm čơđai akô̆ gưl hur har pơƀut mut sang hră, ƀing nai pơtô hrŏm hăng amĭ ama čơđai sang hră ƀơi Sang hră gưl sa hăng gưl dua Nguyễn Văn Trỗi hmâo prăp lui laih pioh ană bă yak mut thun hrăm phrâo hăng tơlơi klă hloh. Amai Phạm Thị Hương – amĭ ama čơđai sang hră ƀơi plơi Klăh, să Ia Mơ, tơring čar Gia Lai lăi pơthâo:

“Kâo prăp lui hơdrôm hră hrăm, gai čih, sum ao; hơđong tơlơi pơmin tơdơi kơ pơdơi prong, pơplih pơkra glăi mông, hrơi hrăm hră pioh ƀing čơđai pơwot glăi sang hră thâo pơmin hloh; tlâ̆o ia jrao pơgang hlôm hlâo pioh bĕ klin ruă”.

Ƀơi să Nhơn Châu, Sang hră gưl sa hăng gưl dua Nhơn Châu thun hrăm anai čơkă 207 čô čơđai, hmâo 9 bôh anih hrăm. Nai Hồ Thị Lại – Kơ-iăng Khua Sang hră brơi thâo, sang hră hmâo 19 čô mơnuih apăn bruă, nai pơtô, mơnuih mă bruă pơkon. Gơnam tam mă yua phun ñu djơ̆ tui tơlơi kiăng pơtô pơhrăm, samơ̆ tơlơi hơdip mơda nai pơtô čơđai ƀơi anih bul pơtâo anai ăt dô̆ kơƀah gêh tơnap mơn, tơlơi nao rai tơnap, biă ñu amăng bơyan hơjan kơthel. Kiăng pơsur pran jua, sang hră hmâo pơpha kual sang dô̆, djru nai pơtô čơđai hơđong pran jua kĕ phĭ hăng bruă mă. Hlâo kơ anun, sang hră dô̆ gum hrŏm hăng hơdôm khul grŭp mơnuih mơnam, djru sa črăn hơdrôm hră hrăm hăng hră čih kơ čơđai sang hră, djru plai ƀiă tơnap kơ amĭ ama čơđai sang hră să bul pơtâo ia rơsĭ anai.

“Hăng tơlơi ƀơi să bul pơtâo ia rơsĭ tơnap tap, per hơdrôm hră hrăm phrâo ăt rơngiă lu prăk mơn. Amĭ ama čơđai bưp tơnap ăt brok kap mơn. Thâo kơ tơlơi anun, sang hră pơsur laih mơnuih mơnam pơplih phrâo. Ră anai hmâo pơsur laih hơdrôm hră phrâo kơ ƀing čơđai anih 6 truh anih 9 hăng hră čih djop brơi kơ ƀing čơđai yak mut thun hrăm phrâo”.

Ơi Phạm Văn Nam – Khua Gơnong bruă pơtô pơhrăm tơring čar Gia Lai brơi thâo, tơdơi kơ pơmut hrom, đơ đam tơring čar ră anai hmâo 1.396 bôh sang hră hăng rơbêh kơ 33.000 čô nai pơtô. Khă hnun hai, yak mut thun hrăm 2025-2026, gơnong bruă ăt dô̆ kơƀah mơn truh kơ 3.532 čô nai hăng mơnuih mă bruă bơhmu hăng tơhnal pơkă, rơnoh pơkă. Ƀu kơnong kơƀah kơ mơnuih mă bruă ôh mơ̆, gơnam tam mă yua ƀơi lu anih, biă ñu kual guai dêh čar hăng bul pơtâo ia rơsĭ, ăt akă djop tui tơlơi kiăng pơtô hăng pơhrăm mơn.

Phrâo anai, Gơnong bruă pơtô pơhrăm pơphun hyu pel ĕp lăng ƀơi 7 bôh să guai dêh čar gah Yŭ hăng ba tơbiă pơjing hơdră sang hră đom lom pơlir gưl hăng abih bang prăk mă yua rơbêh kơ 1.200 klai prăk.

Hơdôm ring bruă amra dưi prăp lui ha amăng plĕ mơ̆ng anih hrăm, anih dô̆, sang ƀong huă, anih ngui ngor truh bruă ia jrao sang hră, djru brơi rơbêh kơ 9.400 čô čơđai sang hră, ha mơkrah lĕ ană bă neh wa djuai ania ƀiă. Pơkă hlâo, sa dua rơwang bruă amra pơphun pơdŏng amăng thun 2025 hăng mă yua mơ̆ng thun hrăm 2026-2027. Anai lĕ tơlơi kiăng yôm phăn djru pơđĭ dlông bruă pơtô pơhrăm ƀơi hơdôm kual tơnap tap.

Kiăng hmao tui tơlơi kiăng thun hrăm phrâo, Gơnong bruă pơphô brơi Jơnum min mơnuih ƀôn sang tơring čar Gia Lai čih pơkra kơčăo bruă ruah mơnuih, pơhrua nao djop mrô nai pơtô dô̆ kơƀah, biă ñu ƀơi hơdôm mơta tơlơi hrăm phrâo tui Jơlan hơdră pơtô pơhrăm thun 2018.

“Gơnong bruă pơphô brơi Jơnum min mơnuih ƀôn sang tơring čar čih pơkra kơčăo bruă ruah djop 1.428 čô nai; đing nao bruă ruah nai phrâo pơtô tơlơi hrăm phrâo mơ̆ng jơlan hơdră pơtô pơhrăm gưl 3 thun 2018, jơlan hơdră mơguah hăng čơtlăm, jơlan hơdră pơtô čơđai anet brơi čơđai mơ̆ng 3-5 thun; čih pơkra kơčăo bruă pơplih, dưm dăp nai pơtô anih rơbêh pơhrua nao kơ anih kơƀah nai, kiăng plai ƀiă tơlơi rơbêh - kơƀah ƀơi sa bit kual, rim plơi pla”.

Hăng tơlơi gum tơngan hrŏm mơ̆ng sang hră, gong gai hăng amĭ ama čơđai sang hră, čơđai sang hră kual guai dêh čar, bul ia rơsĭ ƀơi Gia Lai khă dô̆ tơnap tap ăt phing kơ pran jua yak mut thun hrăm phrâo mơn amăng tơlơi mơ-ak pơhlôm abih bang./.