Hơdôm hrơi bơyan mơyan blan 8 anai, Hà Nội hiam biă mă, hyơ hyor kơ hla kơ hla gru mriah pơtŭ kơñĭ. Hrơi blan anai jai mơak hloh lơ̆m glăk hơmâo tơhan pơtŏp hrăm či rơbat pơtrui ƀơi Tơdron lăk Ba Đình gru hing ang. Ƀơi djŏp glông jơlan, ƀing tơhan găn nao, mơnuih ƀôn sang pơƀut nao lăng lu biă mă, prôk mơ̆ng mơguah mơtăm yơh. Hơmâo lu mơnuih mơ̆ng tơring ataih nao lui mơ̆ng hrơi hlâo, laih anun prôk tơgŭ mơ̆ng mơguah či ĕp anih dŏ lăng rơđah hloh ling tơhan rơbat nao. Adơi Ma Hương mơ̆ng tơring čar Quảng Ninh lăi:“Kâo tơgŭ mơ̆ng 5h30, ƀing gơmơi prôk nao tañ mơtăm đah mơ̆ng hơmâo anih dŏ lăng rơđah, kiăng lăng hyu jơlan, lăng ƀing tơhan rơbat pơtrui găn nao”.

Hrơi pơtŏp tơhan tal 2 hơmâo pơphun mơmot lơ 24/8 phrâo rơgao, hơmâo rơbêh 16.300 čô tơhan hăng 43 khul rơbat, 18 khul ding dong; 6 khul rơdêh pơnah phao kơnông mơ̆ng Khul ling tơhan Việt Nam hăng 8 khul rơdêh yôm phara mơ̆ng tơhan Kông an. Biă ñu, hơmâo ling tơhan mơ̆ng dêh čar ngă gơyut kah hăng Nga, Lao, Kur, jing ngă bruă pơtom hiăp rô nao rai gah bruă tơhan mơ̆ng Việt Nam jai mơ-ak hloh, kơdrưh hloh. Pơ-ư ang lơ̆m hơmâo anăn amăng khul “Tơhan đah kơmơi pôr pơhing” gum rơbat pơtrui tal anai, Thiếu tá Nguyễn Thị Mùi, tơhan apăn bruă lăi pơthâo pran jua ñu tơdơi kơ lu blan pơtŏp đah mơ̆ng dưi rơbat nao pơ tơdron lăk Ba Đình:“Rơbat nao pơ tơdron lăk Ba Đình, kâo pơ-ư ang biă mă mơtăm, kah hăng pơtrut tui pran jua rơbat kjăp kơtang hloh. Găn nao pơ anih arăng đĭ pơhiăp, adoh suang, ƀing gơmơi pơwih ƀô̆ lăng nao pơ tơdron lăk, biă ñu lăng nao pơ Pơsat jep Wa Hồ, amăng alăk mơta amăng pran jua mơ-ak mơ-ai, pơ-ư ang kơtang kơtit”.

Mông pơtŏp hơmâo pơhưč lu mơnuih ƀôn sang pơ plơi prong jưh jom hăng ƀing tuai nao lăng. Ƀơi hơdôm glông jơlan hơmâo tơhan rơbat nao, bă kơ la kơ mriah pơtŭ kơñĭ hiam ƀhêm kar hăng bơnga, por đơhet amăng tơlơi ur hao hač, pah tơngan dor dor mơ̆ng ƀing nao lăng. Tơkai hơyak kjăp, glông nao tơphă mơ̆ng ƀing tơhan, kông an hăng khul mơnuih ƀôn sang jing râu mơdưh pran jua pơ-ư ang djuai ania, râu mơdưh glăi thun blan kơdrưh kơ-ang mơ̆ng sa lŏn ia khin hơtai sông kơtang blah ayăt, kjap pran amăng bruă akŏ pơdong hăng pơgang Lŏn ia. Ƀu ƀiă ôh mơnuih mơ̆ng tơring čar ƀôn prong pơkŏn ataih yaih, tap năng wơ̆t hăng ƀing tuai mơ̆ng čar rơngiao nao tañ biă mă đah mơ̆ng ƀuh hrơi mông kơdrưh kơ-ang yôm pơphăn anai.

Hrơi pơtum pơtŏp tơhan pioh glăi amăng pran jua mơnuih ƀôn sang lu tơlơi ngă ol kơdol biă mă, tơlơi đăo kơnang, pơ-ư ang dlăm biă mă kơ Khul tơhan mơnuih ƀôn sang, Kông an mơnuih ƀôn sang hăng pran kjăp gum pơgôp djuai ania Việt Nam./.