Ƀơi anih mă jua pơhiăp anom bruă pơdong ƀơi kual Dap kơdư, Gong phun jua pơhiăp dêh čar Việt Nam, jua pơđok hmư̆ mơ-ak mut amăng pran jua mơng amai H’Nêc Ênuôl-Mơnuih Ping gah hlăk ai, pô pôr pơhing, dăp hơdră djuai ania Êđê-jua pơđok hmư̆ na nao rĭm hrơi. Mơng glông pôr pơhing, hơdôm tơlơi črâo trun, hơdră bruă mơng Ping gah, Kơnuk kơna dưi nao tơl djop plơi pla ataih giăm, lơm gong pơtui jua pơhiăp lĕ anih yôm phăn kiăng tơkuh nao rai pran đăo gơnang mơng djop djuai ania hăng Ping gah. Amai H’Nêc brơi thâo:

“Hơdip truh prong amăng plơi pla, kâo thâo rơđah boh pơhiăp mơng djuai ania pô yôm phăn hiưm pă ñu. Rĭm tơlơi pơhing, rĭm črăn hơdră lêng hơmâo ƀing gơmơi pơđok hăng tơlơi djuai ania jê̆ giăm, tañ hluh kiăng tơlơi črâo trun, jơlan gah mơng Ping gah, Kơnuk kơna tañ nao jê̆ giăm neh met wa. Mơng hrơi mut Ping  gah, kâo jao hluh rơđah tơlơi glăm ba mơng ƀing čih tơlơi pơhing, mơng pôr pơhing hăng pơ-ư ang yua dưi pơgôp djă pioh pran đăo gơnang mơng plơi pla hăng Ping gah”.

Tơdah boh pơhiăp lĕ anih tơkuh nao rai pran đăo gơnang, gru grua ăt lĕ atur mơng pran gum pơgôp. Ƀơi să Čuôr Đăng, tơring čar Dak Lak, amai H’Pha Ayun-mơnuih Ping gah hlăk ai, Khua khul hlăk ai să hơđăp, ră anai lĕ mơnuih apăn bruă ƀơi anom bruă Ping gah să-mơnuih lêng abih pran jua pơtrut pơsur hlăk ai djă pioh gru grua hiam, laih dong pơlir hăng pơđĭ kyar bơwih ƀong huă mơnuih mơnam. Amai H’Pha brơi thâo:

“Să Čuôr Đăng hơmâo akŏ pơjing 2 grup čing hơgor hăng pơđok tơlơi pơtưh brơi kơ ƀing hlăk ai čơđai, kiăng ƀing gơñu hluh rơđah ƀiă dong gru grua čing hơgor, tơlơi pơtưh mơng djuai ania pô. Abih bang ƀing gơñu tơdơi kơ mut hrŏm grup anai lêng kơ thâo atông čing, hluh rơđah hơdôm tơlơi pơtưh. Mơng anun, ƀing gơñu dưi ngui pơbưp, pơgôp ngă lar hyu gru grua yôm phara mơng djuai anai tơl abih bang hlăk ai čơđai amăng tơring čar Dak Lak”.

Hrŏm hăng djă pioh gru grua, ƀing hlăk ai amăng plơi pla ƀơi Dak Lak ăt lĕ ƀing mơnuih ba jơlan hlâo amăng bruă pơplih mrô-sa bruă akŏ phun mơ̆ Ping gah, kơnuk kơna glăk khut khăt pok pơhai. Ayong Y Lê Pastơr-Kơ-iăng Khua khul hlăk ai tơring čar Dak Lak brơi thâo, hlăk ai djuai ania ƀiă ƀu djơ̆ kơnong tŏ tui pran đăo gơnang nao Ping gah đôč ôh mơ̆ ăt ba jơlan hlâo ngă tui bruă jrao, anun lĕ djru mơnuih ƀôn sang dưi mă yua hơdôm bruă djru ngă hră pơ-ar mơng ataih, pơlir hơbit blơi pơhrui gơnam đang hmua amăng plang sĭ mơdrô điện tử.

“Ƀing gơmơi hơmâo akŏ pơjing hơdôm grup djru ba gong gai dua gưl, črâo ba mơnuih ƀôn sang dưi ngă hră pơ-ar mơng ataih. Hơdôm grup yua boh thâo măi mok hơmâo ngă tui tŭ yua, tong ten ƀơi kual ataih, asuek. Mơng anun, hlăk ai hơmâo pơgôp yôm amăng man pơdong plơi pla, plơi prong hiam klă hăng pơđĭ kyar hơđong kjăp”.

Tŏ tui pran đăo gơnang, djă pioh gru grua hăng gơgrong mut hrŏm, ƀing mơnuih Ping gah djuai ania ƀiă ƀơi Dak Lak glăk jai hrơi pơdah tơlơi gơgrong lĕ anih tơkuh nao rai kơplah wah Ping gah hăng mơnuih ƀôn sang. Ƀing gơñu lĕ ƀing mơnuih ba tơlơi pơtrun mơng Ping gah jê̆ giăm amăng tơlơi hơdip mơda, pơgôp pơjing plơi pla pơdrong asah, gru grua hăng pơđĭ kyar hơđong kjăp lŏn ia.