Tơlơi pơplông hna kơphê Việt Nam amra pơphun amăng lơ 10/3/2025, lăi pơthâo pô hlơi dưi hăng brơi pri amăng lơ 13/3/2025, krĕp hrơi pơphun Jơnum ngui kơphê Buôn Ma Thuột tal 9. Pô nao pơplông jing mơnuih Việt Nam mơ̆ng 18 thun truh pơ ngŏ, glăk hơdip hăng mă bruă ƀơi lŏn ia Việt Nam. Ƀing nao pơplông amra găn rơgao hơdôm tơlơi kah hăng sem lăng pơjeh kơphê či hna; pel lăng măi hna; mơ-it hră čih bruă či hna hăng hră lăi pơthâo anŏ ƀâo hiam, jơman mơ̆ng kơphê; pơphun hna...

Ơi Trịnh Đức Minh - Khua khul ngă kơphê Buôn Ma Thuột brơi thâo, tơring čar Dak Lăk glăk gir đĭ kyar Buôn Ma Thuột jing plơi prong kơphê mơ̆ng rŏng lŏn tơnah, rơngiao kơ pơsit mrô đang pla, mrô gơnam, jing anŏ klă ƀâo jơman mơ̆ng kơphê tơdơi kơ pơkra kiăng lăp đing nao hloh. Truh kih mơ̆ng tal pơplông blung a, amăng tal pơplông thun anai, Khul ngă kơphê hơmâo lu tơlơi pơplih phrâo kiăng ƀing hna kơphê dưi pơƀuh tơlơi rơgơi mơ̆ng ƀing gơñu. Laih dong pơkra rai kơphê klă hloh, pơƀuh anŏ yôm phrâo mơ̆ng kơphê amăng mông hna. Ơi Trịnh Đức Minh brơi thâo: “Pơplông thun anai hơmâo pơphun prong hloh, klă hloh, hơmâo abih bang mơnuih gum ngă hloh. tal 2, čŏm puang kơčok ia kơphê hơmâo čŏm tui hăng hơnong pơkă mơ̆ng SCA (Khul ngă kơphê jơman Jar kmar) hăng CQI (Anom kơsem min kơphê klă ƀơi dêh čar Mi). Tal 3 dong hơmâo iâu mơnuih rơgơi dêh čar tač rơngiao pơtŏng lăng anŏ klă mơ̆ng kơphê, thâo hluh dlăm kơ kơphê, či pơhưč mơnuih amuaih mơñum kơphê nao ngui pơ plơi prong phun pla kơphê”.

Việt Nam nao hlâo ngă kơphê wơ̆t kơphê Robusta djuai jơman hloh mơ̆ng rŏng lŏn tơnah ăt khŏm hơmâo ƀing hna kơphê rơgơi hloh ƀơi rŏng lŏn tơnah mơn. Anai jing tơlơi čang rơmang mơ̆ng Khua Khul ngă kơphê Buôn Ma Thuột, anih git gai mông pơplông Hna kơphê Việt Nam 2025. Tơdơi kơ 2 blan lăi pơthâo, tơlơi pơplông anai hơmâo laih 36 čô mơnuih rai mơ̆ng 13 boh tơring čar ƀôn prong mơ-it hră rơkâo, amăng anun hơmâo tơring čar Dak Lăk hăng ƀôn prong Hồ Chí Minh hơmâo lu mơnuih mơ-it hră hloh.

Tơlơi phara mơ̆ng tal pơplông anai pơhmu hăng tơlơi pơplông hna kơphê ƀơi jar kmar lĕ mă yua kơphê Arabia hăng Robusta Việt Nam. Ƀing pơplông khŏm hna Pour Over (sa hơdă kuor ia kơphê hăng tơngan kiăng mă tŭ anŏ jơman hloh mơ̆ng kơphê) hăng pơkra ia kơhê hăng phin. Hrŏm hăng anun, khŏm rơguăt 3 mơta tơlơi rơgơi: thâo lăng anŏ klă mơ̆ng pơjeh kơphê, hna hăng pơkra ia kơphê. Amăng anun, lăp đing nao hloh bruă čŏm puang kơčok ia kơphê amra hơmâo čŏm tui hơnong pơkă phrâo mơ̆ng SCA Khul ngă kơphê jơman hmư̆ hing Jar kmar) hăng CQI (Anom kơsem min anŏ klă mơ̆ng kơphê ƀơi dêh čar Mi).

Tui hăng ơi Lê Đức Huy: Kơ-iăng khua Khul ngă kơphê Buôn Ma Thuột, pơplông hna kơphê Việt Nam ƀu kơnong jing anih tum pơƀut mơnuih hor, abih pran jua hơduah ĕp, lăi pơthâo tơlơi thâo thăi ngă kơphê, pơjing rai anih pơtruh nao rai ngă pơhưč, bang hyu tơlơi hor kơ kơphê đôč ôh mơ̆ ăt jing bruă pơđĭ tui nua yôm mơ̆ng kơphê Việt Nam. Ơi Lê Đức Huy brơi thâo: “Kiăng đĭ kyar hơđong kjăp pơ anih sĭ mơdrô ƀu kơnong ƀing ta đĭ kyar anih pơkra đôč ôh mơ̆ ăt đĭ kyar anih blơi. Việt Nam pơsit laih jing dêh čar ngă kơphê Robusta prong hloh ƀơi rŏng lŏn tơnah laih anun ƀing ta nao hlâo kơ bruă pơkra kơphê Robusta jơman hmư̆ hing rŏng lŏn tơnah jing ƀing ta khŏm hơmâo mơnuih apăn bruă hna kơphê rơgơi hloh ƀơi rŏng lŏn tơnah”.

Ta dưi lăi, bruă pơplông hna kơphê Việt Nam thun 2025 jing bruă ngă sit nik, pơtrut đĭ kyar bruă ngă kơphê rơguăt bruă hăng hơđong kjăp. Anai ƀu kơnong jing tơlơi gêh gal či pơpŭ kơ ƀing hna kơphê rơgơi đôč ôh mơ̆ ăt jing sa hơyak yôm biă mă amăng bruă pơđĭ tui anŏ yôm, hmư̆ hing mơ̆ng kơphê Việt Nam.

Rơngiao kơ tơlơi pơplông hna kơphê, amăng hrơi Jơnum ngui kơphê Buôn Ma Thuột tal 9 thun 2025, Khul ngă kơphê Buôn Ma Thuột ăt pơphun thim lu bruă ngă pơhưč ƀing tuai kah hăng: Pơplông the Art Amazing Cup 2025 pioh kơ ƀing hor tơlơi hrăm pơkra ia kơphê hiam, jơman, amăng lơ 11/3 hăng Talkshow anăn “Buôn Ma Thuột anih nao čuă lăng mơ̆ng kơphê Rŏng lŏn tơnah” hăng lu mơnuih thâo pơhiăp hmư̆ hing.