Anih pơdă prưng prong giăm 500 met karê mơng VOV ƀơi anih pơdă prưng “80 thun glông jơlan rơngai-ngă pô-yâo mơ-ak” pơdah glông jơlan 80 thun gum hrŏm hăng pơđĭ kyar hrŏm lŏn ia ta. VOV hơmâo tum pơƀut tơlơi thâo thăi, pran jua hur har mơng abih bang mơnuih mă tơlơi pơhing, ƀing dăp hơdră, ƀing mă jua pơhiăp, ƀing rơgơi kơhnâo hăng mơnuih mă bruă kiăng dưm dăp anih pơdă prưng pơƀuh glăi tơlơi kơđŏm hing ang mơng Gong phun jua pơhiăp dêh čar Việt Nam, kar hăng glông pôr pơhing tơlơi rơngai lơ 2/9/1945, pôr pơhing tơlơi dưi Điện Biên Phủ, blah dưi bơyan bơnga thun 1975…thun blan kơđŏm glăi tơlơi hing ang sông kơtang mơng lŏn ia ta. Ơi Phạm Mạnh Hùng-Kơ-iăng Khua Gong phun jua pơhiăp dêh čar Việt Nam brơi thâo:

“Hơdôm tơlơi hơđŏm glăi yôm phăn anun lĕ thun blan pơplih phrâo mơng Ping gah, thun blan pơđĭ kyar kơ djop boh tơhnal, boh thâo ia rơgơi-wai lăng mơng Gong phun jua pơhiăp pơlir hơbit, gum hrŏm hăng hơdôm gru grua yôm phăn amăng lŏn ia hiưm pă ñu lêng kơ hơmâo pơdah ƀơi anih pơdă prưng mơng Gong phun jua pơhiăp dêh čar Việt Nam. Lơm mơnuih ƀôn sang nao lăng anih pơdă prưng anun amra ƀuh glăi gru grua pơđĭ kyar 80 thun rơgao mơng Gong phun jua pơhiăp dêh čar Việt Nam, mơng hrơi pôr pơhing blung a lơ 7/9 thun 1945 truh rơwang pơplih phrâo ră anai. Rĭm rơwang gru grua pơđĭ kyar lŏn ia lêng kơ hơmâo tơlơi gum hrŏm hăng tơlơi mut hrŏm mơng Gong phun jua pơhiăp dêh čar Việt nam amăng rơnuk ngă hơkrŭ mơng dêh čar”.

Ơi Phạm Mạnh Hùng ăt pơsit tong: Amăng hrơi mông pơphun pơdă prưng, VOV amra pơpha mơnuih apăn bruă, ƀing čih tơlơi pơhing, ƀing rơgơi kơhnâo pơbưp nao rai hăng pơblang bruă bruă mă, pel ĕp gru grua hing ang mơng Gong phun jua pơhiăp dêh čar Việt Nam.

“Mơng hơdôm hơdră pơƀuh phara hăng yôm phăn, kiăng ƀing mơnuih nao lăng anih pơdă prưng dưi ƀuh glăi rơđah rơđông bruă mă hăng hơdôm jua pôr mơng Gong phun jua pơhiăp dêh čar Việt Nam, dưi pel lăng hơdôm anih pơƀuh VR kơ lơ 2/9 ƀơi tơdron lăk Ba Đình, lơm wa Hồ pơđok hră pơsit rơngai lŏn ia; ƀudah hơdôm tơlơi kơđŏm glăi yôm phăn lêng hơmâo pôr amăng jua pơhiăp. Ƀing gơmơi amra lăi pơthâo hơdôm glông pôr pơhing phrâo mơng Gong phun jua pơhiăp dêh čar Việt nam anun lĕ: Glông pôr pơhing điện tử Gong phun jua pơhiăp dêh čar Việt Nam. Glông pôr pơhing điển tử VTCNews, glông pôr pơhing jơlan glông hăng hơmâo akŏ pơjing phrâo pôr pơhing jơlan glông kual ter hang ia rơsĭ; dưi hmư̆ hơdôm boh tơhnal mơ̆ ră anai glăk lăi pơthâo amăng glông pôr tui boh thâo mrô”.

Ring bruă pơdă prưng “Tơlơi dưi lŏn ia-Bruă mă amăng 80 thun yua tơlơi rơngai-ngă pô-yâo mơ-ak” ƀơi sang pơdă prưng lŏn ia (Đông Anh, Hà Nội) pok čơkă mơnuih ƀôn sang mut nao lăng, pel ĕp mơng lơ 28/8 truh lơ 5/9, him lăng amra ba glăi tơlơi mơ-ak hăng pơ-ư ang mơng rĭm čô mơnuih ƀôn sang Việt Nam./.