Sang gru grua ƀuôn Tơ̆ng Jŭ, phường Ea Kao hmư̆ dik dak jua čing hơgor, hăng hơdôm tơlơi ayun suang mơ-ak, prap čơkă tuai čuă ngui amăng bơyan čuă ngui blung a tơdơi kơ pơmut hrŏm. Kơplah wah jua dik dak anun, yă H’Yam Bkrông - Khua anom bơwih ƀong hrŏm gah mơñam mrai Tơ̆ng Bông, khua grup bơwih brơi tuai čuă ngui amăng plơi Tơ̆ng Jŭ-pơ-ư ang yua amăng 10 boh plơi pla lêng kơ hơmâo sa tơlơi yak nao amăng tŏ tui gru grua mơñam mrai. Bruă pơlir tơlơi dưi amăng djop plơi pla kiăng pơđĭ kyar bơwih brơi tuai čuă ngui amăng plơi pla ăt ba nao amăng tơlơi pơtrun Jơnum Ping gah phường.

“Ƀing gơmơi pơmĭn anăp nao djă pioh bruă mơñam mrai mơng ƀing gơmơi, hăng bruă pok anih pơtô hrăm, tal dua dong lĕ pơđĭ kyar bơwih brơi tuai čuă ngui amăng plơi pla, neh met wa amra gum hrŏm, kiăng arăng nao lăng gru grua mơng ƀing gơmơi anun lĕ bruă mơñam mrai, kŏng tơpai, trah rup kyâo, nao ngă hmua hrŏm laih dong gru grua čing hơgor, tơnă hơbai. Lơm pơmut hrŏm, ƀing gơmơi ƀu sa, dua boh plơi pla djuai ania ƀiă pơlir hơbit kiăng pơđĭ kyar kơtang ƀiă”.

Tui hră lăi pơthâo kơđi čar Jơnum Ping gah tơring čar Dak Lak tal XVIII, rơwang thun 2025-2030, tơring čar amra pơđĭ kyar kơtang hơdôm gơnam bơwih brơi tuai čuă ngui phun, tơlơi dưi anun lĕ čuă ngui ter hang ia rơsĭ-glai rưng ƀơi hơdôm đang glai dêh čar, hơdôm anih wai pơgang glai, pơđĭ kyar gơnam tuai čuă ngui amăng plơi pla, đang hmua hăng ƀon lan; nao lăng arăng mơñam mrai. Ơi Nay Khang, djuai ania Êđê, plơi Độc Lập B, să Suối Trai, tơring čar Dak Lak đăo gơnang, plơi pla gơñu amra tŭ mă tơlơi dưi hăng jơlan gah pơđĭ kyar tơring čar phrâo, lơm dong amăng kual đang glai-ngă hmua mơng hơdôm kual pla sầu riêng prong gah Yŭ Dak Lak, pơlir kual wai pơgang glai Ea Sô, dơnao ia krông Ba Hạ, kual wai lăng glai Krong Trai hăng trun nao ha ia rơsĭ Phú Yên.

“Bruă pơmut hrŏm lĕ lăp djơ̆ kiăng pok rai tơlơi gal pơmut hrŏm pơđĭ kyar bơwih ƀong huă, hơmâo glai, hơmâo čuă, hơmâo ia krông, hơmâo ia rơsĭ kiăng pơđĭ kyar tơlơi bơwih ƀong huă neh met wa djuai ania ƀiă jai hrưn đĭ. Ta yak nao rơnuk pơplih phrâo, rơnuk hrưn đĭ mơng djuai ania pô”.

Ăt tui ơi Nay Khang, ơi Sô Văn Sứt, djuai ania Chăm H’roi, mơnuih arăng đăo gơnang amăng plơi Ma Y, să Sơn Hòa brơi thâo, bruă pơmut hrŏm ngă kơ lu plơi pla mơng glai rưng truh pơ ha ia rơsĭ jing jê̆ giăm. Hăng mơng tơlơi giăm anun, plơi pla amra hơmâo lu tơlơi dưi pơđĭ kyar:

“Hlâo adih ăt pơmut hrŏm Khánh Hòa, Phú Yên, samơ̆ lơm anun jơlan nao rai tơnap tap, pơlăi nao rai aka ƀu tañ, truh ră anai yua boh thâo phrâo đơ đam, kâo pơmĭm amra klă ƀiă. Ngă jê̆ giăm tui hăng hơmâo dong bruă mă, bơwih ƀong đĭ đăi, hơđong kjăp, pơplih phrâo ƀiă kiăng pơđĭ kyar lŏn ia, hrưn đĭ prong kơtang amăng rơnuk phrâo”.

Hăng tơlơi hok mơ-ak lơm pơmut jing sa boh tơring čar Dak Lak pơprong ƀu djơ̆ kơnong tơlơi hok mơ-ak lơm hơmâo hơdră yôm phăn, pok rai pơđĭ kyar phrâo. Tui yă Cao Thị Hòa An-Kơ-iăng Khua git gai Ping gah, Khua jơnum min pơ ala mơnuih ƀôn sang tơring čar Dak Lak, anai ăt lĕ boh tơhnal mơng tơlơi pơkôl gru grua blah wang mơng đưm hlâo. Yă An ol kơdol bơră ruai lơm ñu nao Jơnum Ping gah să ngă hơkrŭ Yang Mao:

“Nao jơnum giong, kâo ƀuh hơmâo sa čô đah kơmơi rơbêh 80 thun hăng hơmâo grač pơpŭ 60 thun mut Ping gah, ñu rai giăm kâo hăng lăi: Kâo hmư̆ hing, ih lĕ mơng Phú Yên, kâo hok mơ-ak biă mă lơm dưi bưp ih. Hmư̆ ñu lăi tui anun, amăng pran jua kâo ăt ol kơdol ƀlĕ ia mơta. Ñu ăt lăi dong amăng rơnuk blah wang, Dak Lak-Phú Yên bă blai pran khăp pap, ñu hơmâo lu gŏp tơhan mơng Phú Yên, yua anun ñu khăp mơnuih ƀôn sang Phú Yên biă mă. Anun lĕ tơlơi pơtrut pran gum pơgôp, mơng tơlơi mut hrŏm hăng đăo gơnang nao gru grua mơng djop rơnuk”.

Bruă pơmut hrŏm anih anom ƀơi Dak Lak glăk ba glăi boh tŭ yua ƀu djơ̆ kơnong amăng hră pơ-ar đôč ôh mơ̆ ăt tơlơi hơdip sit nik mơng mơnuih ƀôn sang. Mơng hơdôm boh plơi pla ataih giăm hơdôm hơpluh km, ră anai mut glăi jing sa boh sang, mơnuih ƀôn sang ƀu djơ̆ kơnong giăm gong gai ƀiă đôč ôh ăt giăm nao rai ƀiă dong, pơlăi nao rai tơlơi dưi, pok rai tơlơi bơwih ƀong phrâo. “Sang dŏ pơprong” Dak Lak mơng anun jing anih gơnang nao hơđong kjăp brơi abih bang mơnuih ƀơi anai./.