Anai lĕ plơi prong amăng tơring čar Dak Lak samơ̆ ƀơi plơi prong Buôn Ma Thuột, mrô rơdêh kông nông ăt lu biă mă hăng hơdôm rơbâo boh, sit biă ñu ƀơi hơdôm boh să jum dar. Ơi Y Thơm Kênh, dŏ amăng ƀut plơi 1, să Čư̆ Êbur, plơi prong Buôn Ma Thuột brơi thâo, mah hơmâo prăk kak pioh kơ blơi rơdêh prong, samơ̆ ñu ăt dŏ yua rơdêh kông nông yua hơmâo lu anŏ kiăng yua mơng rơdêh anai. Rơngiao kơ bruă pơdŭ pơgiăng gơnam tam, rơdêh anai ăt yua kiăng kơ čoh đang hmua lơm arăng dưm truă nao čong čoh. Ơi Y Thơm ăt brơi thâo, rơdêh kông nông hơđăp ƀu pơhlôm rơnuk rơnua, yua anun hlâo kơ blơi rơdêh phrâo, ñu ăt hmư̆ tui tơlơi pơtă mơng kông ang să, mă yua giăm dua wŏt ha mơkrah kiăng kơ blơi rơdêh pơhlôm rơnuk rơnua:

“Lơm pơkra ming rơdêh anai kông ang ăt lăi pơthâo, khŏm truă apui kơđen kiăng pơthâo hlâo lơm wêt hyu gah hơnuă ƀudah gah ieo, kiăng hơmâo pep mơn. Abih tih prăk pơkra ming lĕ 125 klăk. Mơ̆ rơdêh anai ƀu kiăng wŏt, kơnong gư̆ mă amra đôh mơtăm”.

Tui tơlơi sit nik ƀơi să Čư̆ Êbur, tơring čar Dak Lak ăt kah hăng hơdôm boh ƀon lan amăng hơdôm boh tơring čar kual Dap kơdư, hơmâo ƀiă đôč rơdêh kông nông truă apui kơđen, apui pơthâo hlâo lơm wêt hyu, hơmâo pep. Amăng hơdôm rơtuh rơbâo rơdêh anai, kơnong ƀiă đôč rơdêh pơdŭ pơgiăng gơnam đang hmua, gơnam yua man pơdong…hơmâo pô mơgăt đing nao bruă pơhlôm rơnuk rơnua. Dŏ glăi kơnong yua tui bơyan mơn, apui kơđen, pep lêng kơ răm rai yơh, ngă ƀu pơhlôm lơm đuăi amăng jơlan glông, hăng ƀuh lu wŏt ƀuh rơdêh pơjrŏm ngă djai mơnuih. Lu wŏt ƀuh rơdêh pơjrŏm bơdjơ̆ nao rơdêh kông nông đuăi amăng mơmŏt mlăm, lơm rơdêh anai juăt ngă hơgŏm. Kiăng kơ plai ƀiă ƀuh rơdêh pơjrŏm, mơng akŏ thun 2024, tơhan pôlih hăng kông ang hơdôm boh să ƀơi 2 boh tơring čar Dak Lak, Dak Nông, hơmâo pơphun lu wŏt bruă hyu tĕp decal jă brơi rơdêh kông nông, bruă anai pơhưč lu mơnuih ba nao rơdêh. Tui Đại úy Bùi Mạnh Tuấn, Kơ-iăng khua kông ang să Čư̆ Êbur, plơi prong Buôn Ma Thuột, tơring čar Dak Lak, bruă tĕp decal jă ƀu djơ̆ kơnong lĕ hơdră bruă kiăng tañ pơƀuh đôč ôh mơ̆ anai lĕ hơdră pơtô pơblang djop mơta kơ bruă pơhlôm rơnuk rơnua hăng rơdêh kông kông:

“Bruă tĕp decal jă  anai ăt kiăng pơbưp nao rai neh met wa. Mơng bruă tĕp decal jă anai kiăng pơtô pơblang, pơtrut pơsur, iâu pơthâo neh met wa dưm truă apui kơđen, pep…kiăng pơhlôm rơnuk rơnua lơm đuăi rơdêh amăng jơlan glông. Bruă anai amra ngă tui ƀơƀrư̆, pơphun na nao, kiăng kơ plai ƀiă ƀuh rơdêh pơjrŏm”.

Ƀơi 5 boh tơring čar ƀơi kual Dap kơdư ră anai hơmâo giăm 200.000 boh rơdêh kông nông. Bruă tĕp decal jă brơi rơdêh anai hơmâo pok pơhai dong mơng thun 2019 ƀơi sa, dua boh să. Truh akŏ thun anai, hơdră bruă anai phrâo pok pơhai ƀơi djop anih, pơlir hăng bruă pơtô pơblang hơdôm tơlơi pơkă lơm đuăi rơdêh amăng jơlan glông, sit biă ñu bruă anăm brơi đuăi kơtang đơi pơhmu hăng tơlơi pơkă, anăm pơgiăng mơnuih gah tlôn; răng kơđiăng lơm wêt hyu, găn nao rai djơ̆ hăng tơlơi pơkă…Thượng tá Phạm Quốc Lập-Khua anom bruă tơhan pôlih, kông ang tơring čar Dak Nông brơi thâo, tui tơlơi sit nik ƀơi tơring čar, anai lĕ hơdră bruă ba glăi tŭ yua:

“Bruă tĕp decal jă brơi rơdêh kông nông kiăng mơnuih đuăi rơdêh amăng jơlan glông tañ ƀuh rơdêh glăk đuăi pơ anăp, kiăng pơgang pơgăn hŭi pơjrŏm rơdêh. Hrŏm hăng anun lĕ hơdră pơtô pơblang, pơtrut pơsur, pơsir hĭ rơdêh ƀuh pơhlôm djơ̆ tơlơi pơkă amra ngă hŭi rơhyưt lơm đuăi rơdêh amăng jơlan glông”.

Mah ba glăi tơlơi dưi prong amăng bruă pơhlôm rơnuk rơnua mơng rơdêh kông nông lơm đuăi amăng jơlan mơmŏt mlăm, samơ̆ bruă tĕp decal jă brơi rơdêh anai ƀu djơ̆ hơdră sui pơ anăp. Anai lĕ rơdêh pơgiăng gơnam juăt yua, hơdôm boh rơdêh anai juăt pioh gan rơngiao hơjan pơ-iă, đuăi amăng jơlan dơluh bor, bing djơ̆ phun kyâo na nao yua amra ngă pok hĭ decal. Kiăng kơ plai ƀiă ƀuh rơdêh pơjrŏm, rơdêh kông nông ƀơi kual Dap kơdư kiăng wai lăng kjăp tui hơnong pơkă pơhlôm rơnuk rơnua mơng hrơi pơkra mơtăm. /.