Anai lĕ, thun hrăm blung a bruă pơtô hrăm, yak nao amăng čăl phrâo lơ̆m tơring čar Dak Lak pơmut hrŏm Phú Yên jing sa, Akŏ phun kơ tơlơi lăi nao, abih bang glông bruă Pơtô hăng Pơjuăt ruah mă lĕ : “Tơpă hơnơ̆ng-Thâo pơčeh phrâo-Pơblih kơtang hloh-Pơđĭ kyar”. Tơdơi kơ pơmut jing sa, bruă pơtô hrăm tơring čar Dak Lak pok prong tui hơmâo rơbêh 1.370 boh anih pơtô hrăm mơ̆ng sang hră gưl muai truh gưl klâo, bruă pơtô hrăm bruă mă hăng pơtô hrăm re se. Amăng tơring čar hơmâo rơbêh 700.000 čô čơđai sang hră, ƀing mơnuih apăn bruă hrăm bruă hăng hrăm amăng anih pơtô hrăm re se, wơ̆t hăng 38.400 čô nai pơtô, khua mua apăn bruă wai lăng bruă pơtô hrăm, dưi djop hăng bruă jao pơtô hrăm.

Tơhnal pơkă kơ thun hrăm anai lĕ, tơring čar Dak Lak gir run pơđĭ mrô sang hră ngă djơ̆ tơhnal pơkă hiam gưl dêh čar truh 55%, djă kơjăp rơnoh čơđai sang hră hrăm abih anih 12 dưi hơmâo băng lĕ 98% laih anun ngă pơhrŏ tui anŏ pleh ploh tơlơi thâo pơtô hrăm kual gêh găl hăng kual tơnap tap ƀu gêh găl, anăp nao bruă pơđĭ kyar pơtô hrăm bơkơnar hăng hơđong amăng đơ đam bruă pơtô hrăm.Ƀơi tơring čar Gia Lai , rơbêh kơ 760.300 čô čơđai sang hră ƀơi 1.200 bôh sang hră gum hrŏm ngă Lơphet pok phun thun hrăm 2025-2026. Ayuh hyiăng bơngač, ƀu hmâo hơjan anun tơlơi dik dak kơ hrơi jơnum abih bang mơnuih ƀôn sang ba ană bă nao sang hră.

Thun hrăm anai, tơring čar Gia Lai hmâo 760.306 čô čơđai sang hră ƀơi 23.017 bôh anih hăng abih bang mrô 37.347 čô mơnuih apăn bruă, nai pơtô čơđai, mơnuih mă bruă. Khă hnun hai, gơnong bruă pơtô pơhrăm ăt kơƀah mơn rơbêh kơ 3.500 čô mơnuih bơhmu hăng tơhnal ba tơbiă, lơm anun anih anom gơnam mă yua ƀơi lu anih, biă ñu kual guai dêh čar, akă djop. Ƀơi anăp, gơnong bruă pơtô pơhrăm amra pơphô kơ Jơnum min mơnuih ƀôn sang tơring čar Gia Lai ruah pơhrua nao dong 1.428 čô nai, hrŏm hăng anun dưm dăp, pơplih lăp djơ̆ kiăng djop tui bruă pơtô pơhrăm, biă ñu hơdôm tơlơi hrăm phrâo tui Jơlan hơdră pơtô pơhrăm thun 2018. Anai lĕ yak prăp lui yôm phăn pioh pơhlôm kơjăp bruă pơtô pơhrăm amăng thun hrăm phrâo.