Mơmŏt tom brơi 11/9, ƀơi Tokyo, Sang anih jưh pơ ala dêh čar Việt Nam ƀơi Japan pơphun yôm phăn tal hơdor glăi 80 thun akŏ pơjing Kơnuk kơna dêh čar Cộng hòa xã hội chủ nghĩa Việt Nam, hăng tơlơi mut hrŏm mơng giăm 500 čô khua mua pơ ala brơi Kơnuk kơna, sang bruă, anom bơwih ƀong sĭ mơdrô, ƀon lan, anom čih tơlơi pơhing Japan hăng hơdôm anom bruă pơtom hiăp mơng tač rơngiao ƀơi Japan. 

Đĭ pơhiăp amăng mông ngă lơphet, Khua anih jưh pơ ala dêh čar Việt Nam ƀơi Japan Phạm Quang Hiệu lăi rơđah kơ tơlơi ngă bơngač 80 thun hlâo hăng yôm hloh lĕ lơ 2/9/1945 hăng glông jơlan glêh tơnap, samơ̆ ăt pơ-ư ang hăng hơdôm tơlơi truh kih mơng djop djuai Việt Nam. Pơ ala dêh čar Japan, ơi Fukuyama Tetsuro-Kơ-iăng Khua git gai pơ ala mơnuih ƀôn sang gơnong glông dêh čar Japan pơpŭ Việt Nam tơlơi dưi amăng hrơi blan rơgao, laih dong pơsit tong tơlơi čang rơmang ngă dơlăm tui dong tơlơi rô nao rai hăng Việt Nam pơ anăp anai.