Rơđah biă ñu, ƀơi să Ia Hiao, hơjan prong sui ngă kơ 120 boh sang anŏ dăo abih sang; 109 ha hmua pơdai, 86 ha đang kơtor, rơtă hăng 43 ha đang hơbơi plum rơbuh, dăo mlĕp amăng ia, tơlơi răm rai anai him lăng rơbêh kơ 2,4 klai prăk. Hrŏm hăng bruă pơhlôm rơnuk rơnua kơ mơnuih ƀôn sang, gong gai glăk lăng glăi, rơkâo hăng tơring čar tañ pơsit brơi akŏ pơdong plơi phrâo kơ hơdôm boh sang juăt ia dăo rim thun, laih dong rơkâo djru prăk pơsir tơlơi răm rai đang hmua, hơđong tơlơi hơdip brơi mơnuih ƀôn sang.

Ƀơi să Ea Bung, tơring čar Dak Lak sa, dua boh sang anŏ amăng ƀut plơi 4 hăng 12 ia dăo, jơlan tơkuh nao rai să Ea Bung-Ia Rvê ăt ƀu dưi đuăi nao rai. Ƀơi să Ia Lốp, ƀut plơi 10 găn nao ƀut plơi 11 ăt ia tluh rô găn nao, lu arăt jơlan amăng ƀut plơi 6,8,9 ia dăo dơlăm, jơlan ƀu dưi găn nao rai amăng hơdôm mông. Ƀơi să Tây Sơn, hơjan prong ngă lŏn tơhroh lu anih rôk tui jơlan DT646 hăng sa, dua ară jơlan amăng plơi pla, jơlan nao pơ hmua. Hrŏm hăng anun, hơmâo 29 drơi rơmô ia kor đuăi; pơga Sang hră čơđai anet kơnuk kơna pơdong Phước Tân ăt glưh glông giăm 40 met. Ră anai, gong gai ƀon lan hơmâo pơkiăo nao mơnuih rŭ pơdong, djru brơi mơnuih ƀôn sang hăng pơhlôm jơlan nao rai hruaih.

Hơjan prong ngă dăo rơbêh 300 boh sang anŏ ƀơi 4 boh plơi mơ̆ng să Hiệp Thạnh, tơring čar Lâm Đồng. kiăng djru mơnuih ƀôn sang tañ hơđong glăi tơlơi hơdip, gong gai iâu pơthưr ƀing khua, tơhan kông an, tơhan ƀô̆ đô̆i djru ba mơnuih ƀôn sang pơdŭ mơ̆ng anih ba đuăi glăi pơ sang. Ƀơi să ter hang ia rơsĭ Hòa Thắng, hơjan prong ngă čuah rô mut nao pơ sang ană plơi. Puih kơđông tơhan pơgang guai Hòa Thắng iâu pơthưr ƀing khua, ling tơhan djru mơnuih ƀôn sang rơmet rơmot sang anŏ kiăng hơđong tơlơi hơdip.