Ƀơi ring bruă man pơkra, dưm truă 3, ring bruă črăn tal 3 jơlan rơdêh đuăi hmar Khánh Hoà-Buôn Ma Thuột, kông tai man pơdong mrô 1 hơmâo pơkiăo nao 60 čô kỹ sư hrŏm hăng 60 rơdêh, măi mok djop mơta ječ ameč man pơkra. Ayong Nguyễn Đình Lợi, mơnuih mă bruă ƀơi anai brơi thâo

“Ngă tui tơlơi git gai mơng Khua dêh čar lĕ kơnong pơčrông ngă mơ̆ ƀu pơtah hơtai ôh, găn rơgao tơnap tap mă bruă tơhrơi kah hăng mlăm, tơlơi anai ngă lar hyu hơdôm anih man pơkra jơlan rơdêh đuăi hmar Khánh Hòa-Buôn Ma Thuột, yua anun yơh ƀing apăn bruă, kông ñơn, mơnuih mơgăt rơdêh lêng kơ gir run ngă tui tơlơi git gai mơng Khua dêh čar, Hơdôm tơlơi tơnap tap ƀơi anih man pơkra anun lĕ hơjan hlim ăt gir run hăng pran jua “hơjan rơnang lăng kar hăng ƀu hơjan, tơdah hơjan prong lăng kar hăng hơjan anet, păng ƀat mă bruă”.

Arăng jao man pơkra 16,5 km ƀơi tơring čar Dak Lak hăng 22 km gah tơring čar Khánh Hòa, ơi Nguyễn Viết Hải, Khua khul ding kơna grup Sơn Hải brơi thâo, grup hơmâo pơkiăo nao abih bang mơnuih mă bruă, gơnam măi mok, mă bruă tơhrơi kah hăng mlăm kiăng tañ man pơkra giong hlâo hrơi pơkă:

“Ƀing gơmơi ƀuăn jơlan Nha Trang-Buôn Ma Thuột amăng ring bruă črăn tal 3 amra pơgiong amăng thun 2025, anai lĕ hlâo hăng hrơi pơkă ha thun anun lĕ 2026. Hăng jơlan Nha Trang-Buôn Ma Thuột gah ring bruă črăn tal 1 găn nao Khánh Hòa 22 km tô mơng jơlan črăn tal 1 nao jơlan mrô 26, ƀing gơmơi ăt ƀuăn ngă pơgiong tañ amăng thun 2025”.

Jơlan rơdêh đuăi hmar Buôn Ma Thuột – Khánh Hòa glông 117,5 km, hơmâo pơčlah 3 črăn man pơkra, hơmâo man pơkra mơng blan 6 thun 2023, him lăng amra pơgiong amăng thun 2026. Truh ră anai, ring bruă črăn tal 1 yua Jơnum min mơnuih ƀôn sang tơring čar Khánh Hòa pô tuh pơ alin rơnoh man pơkra 20%; ring bruă črăn tal 2 yua Ding jum wai lăng jơlan glông ngă pô tuh pơ alin rơnoh man pơkra giăm 7%; ring bruă črăn tal 3 yua Jơnum min mơnuih ƀôn sang tơring čar Dak Lak ngă pô tuh pơ alin glăk rơnoh man pơkra rơbêh 15%. Ơi Phạm Ngọc Nghị, Khua jơnum min mơnuih ƀôn sang tơring čar Dak Lak brơi thâo, akŏ bruă lăp djơ̆ hăng thun blan pơkra tui tơlơi pơtrun mrô 89/NQ-CP lơ 25/7/2022 mơng Kơnuk kơna.

“Ngă tui tal pơplông mă bruă yua Khua dêh čar pơphun, tơring čar Dak Lak ƀuăn tŏ tui ngă khut khăt ƀiă dong amăng bruă krăo lăng, pơtrut pơsur, ngă gêh gal hloh kiăng hơdôm anom bruă man pơkra ngă pơgiong bruă jao. Kâo đăo gơnang, hăng tơlơi git gai khut khăt mơng Khua dêh čar, tơlơi gir run mơng djop ding jum, gơnong bruă gơnong glông; tơlơi gir run mơng mơnuih ƀôn sang djop djuai ania amăng tơring čar, ring bruă črăn tal 3 amra pơgiong amăng thun 2025 hăng djop ring bruă tuh pơ alin man pơkra jơlan rơdêh đuăi hmar Khánh Hòa-Buôn Ma Thuột rơwang tal 1 amra pơgiong djơ̆ hăng tơlơi pơkă ba tơbiă”.

Hăng tơlơi đing nao, git gai mơng gơnong glông truh pơ ƀon lan, tơlơi gơgrong, gir run khut khăt mơng anom bruă tuh pơ alin hăng man bruă man pơkra, čang rơmang jơlan rơdêh đuăi hmar Khánh Hòa – Buôn Ma Thuột amra tañ giong hlâo hăng hrơi blan pơkă, djơ̆ hăng tơlơi čang rơmang mơng mơnuih ƀôn sang./.