Jơlan mrô 26, glông 40 km mơng Buôn Ma Thuột, amăng bơyan anai juăt ƀuh kơniă. Rơdêh container, rơdêh pơgiăng gơnam pơprong, rơdêh kông nông hăng hơdôm boh rơdêh thut pơgiăng boh sầu riêng, pơgô̆ amăng jơlan kơniă. Rĭm wŏt hơmâo rơdêh container wêt hyu, amra ngă lu rơdêh ƀu thâo đuăi dong tah. Ayong Đinh Quang Huy, mơnuih ƀôn sang dŏ amăng să Ea Knuêč brơi thâo:

“Hơdôm thun giăm anai, bruă lu rơdêh găn nao rai pơdŭ pơgiăng gơnam, sit biă ñu lĕ boh sầu riêng, ƀuh lu tui ngă jơlan glông kơniă, rơdêh tơnap đuăi nao rai ƀuh tơhrơi kah hăng mlăm. Kâo rơkâo kơnuk kơna tañ tuh pơ alin pok prong jơlan kiăng mơnuih ƀôn sang nao rai, pơdŭ pơgiăng gơnam tam brơi gêh gal”.

Ayong Trần Văn Định, mơnuih mơgăt rơdêh container hăng 10 thun pơdŭ pơgiăng boh sầu riêng pơ tač rơngiao hăng đuăi nao hơdôm boh tơring čar brơi thâo:

“Hlâo adih, lơm sầu riêng aka ƀu pơđĭ kyar, anun gơnam pơgiăng hyu ƀiă, mơng Krông Pač nao pơ Buôn Ma Thuột rơngiă kơnong mơng 25-30 mơnit. Samơ̆, boh sầu riêng jai lu tui, rơdêh pơdŭ pơgiăng ăt lu mơn, ngă kơniă amăng jơlan glông, nao rai giăm 30 km rơngiă mơng 1-2 mông, đa sui ƀiă. Tơdah dua boh rơdêh container găn nao rai dua bơnah amra ngă abih jơlan brơi rơdêh pơkŏn, hŭi rơhyưt biă mă. Ƀing mơgăt rơdêh kar hăng ƀing gơmơi čang rơmang Kơnuk kơna tuh pơ alin pok prong jơlan kiăng bruă pơdŭ pơgiăng gơnam gêh gal, amuñ ƀiă”.

Trung tá Lương Xuân Ngọc, Khua grup tơhan pôlih wai lăng jơlan mrô 2, kông ang tơring čar Dak Lak brơi thâo, hlâo adih, rĭm hrơi hơmâo kơnong mơng 3.000-5.000 boh rơdêh đuăi nao rai amăng jơlan mrô 26 găn nao hơdôm boh să amăng tơring glông Krông Pač (hơđăp) mut nao Buôn Ma Thuột. Ră anai, mrô anai đĭ rơbêh 10.000 boh rơdêh amăng ha hrơi, amăng anun hơmâo hơdôm rơtuh rơdêh container hăng hơdôm rơbâo boh rơdêh pơprong, kông nông pơgiăng boh sầu riêng. Trung tá Lương Xuân Ngọc brơi thâo, bruă črâo brơi rơdêh amăng jơlan mrô 26 ră anai glăk lĕ bruă jao akŏ phun mơng tơhan pôlih wai lăng jơlan glông:

“Ƀing gơmơi hơmâo gơgrong pơpha 3 grup dŏ gak, kah pơpha hăng črâo brơi rơdêh đuăi nao rai amăng mông lu rơdêh hloh mơng 3 mông tlam truh 7 mông mơmŏt rĭm hrơi. Laih dong, pơpha mơnuih apăn bruă amăng grup pơtô pơblang, lăi pơthâo brơi rơbêh 50 anih blơi pơhrui gơnam, rơbêh 150 boh rơdêh container hăng giăm 200 boh sang anŏ hơmâo rơdêh kông nông ngă tui djơ̆ tơlơi pơkă amăng pơgiăng boh sầu riêng hơđong, pơhlôm brơi jơlan hruaih, huăi ngă kơniă”.

Jơlan mrô 26 glông 151 km, anai lĕ jơlan phun tơkuh nao rai kơplah wah tơring čar Dak Lak hăng Khánh Hòa, tơkuh nao jơlan mrô 1A hăng hơdôm tơdrun kompăn pơgiăng gơnam đang hmua tơbiă nao hơdôm boh amăng jang gah kơdư. Ơi Lương Huy Hoàng-Khua kông ti pơčruih ngăn wai lăng hăng man pơkra jơlan glômg mrô 26 brơi thâo, jơlan anai hơmâo tuh pơ alin pơkra ming amăng lu rơwang laih, yua anun đa hơmâo anih prong 11 met, đa 9 met, sa, dua ară jơlan prong 6 met. Rơdêh nao rai lu tui lơm jơlan amăng pok prong bơkơnar ngă kơniă. Tui ơi Hoàng, kiăng pơsir hĭ khut khăt kơ bruă anai, kiăng pok prong jơlan dŏ glăi brơi prong 11 met, djơ̆ hơnong pơkă gưl II, samơ̆ ră anai ăt aka ƀu hơmâo prăk tuh pơ alin.

“Ƀing gơmơi hơmâo ngă hră pơ-ar rơkâo Jơnum min mơnuih ƀôn sang tơring čar Dak Lak kah pơpha prăk man pơkra jơlan anai. Lơm pơkra ming, jơlan amra tơkuh nao rai hăng jơlan rơdêh đuăi hmar (Khánh Hòa-Buôn Ma Thuột) pơ anăp, gêh gal amăng bruă pơgiăng gơnam đang hmua, sit biă ñu boh sầu riêng. Bruă pơkra ming jơlan anai kiăng giăm 80 klai prăk, mrô prăk anai kơnong yua man pơkra, mơ̆ bruă pok prong hơmâo prap lui hlâo laih, yua anun huăi kiăng duh prăk pơhrui lŏn mơnai”.

Lơm jơlan mrô 26, ară jơlan mơng Buôn Ma Thuột găn nao hơdôm boh să Ea Knuêč, Krông Pač, Tân Tiến hăng Ea Phê (Dak Lak) tuh pơ alin pơkra ming djop mơta, jơlan anai amra jing anih pơlir phun kơplah wah hơdôm ară jơlan ƀơi Dak Lak, tơkuh nao rai hăng jơlan rơdêh đuăi hmar blung a mơng kual glai rưng nao pơ ia rơsĭ anun lĕ Buôn Ma Thuột-Khánh Hòa ƀiă pơkra giong laih. Jơlan glông hơmâo pơkra giong amra pok rai bruă pơdŭ pơgiăng, blơi pơhrui gơnam đang hmua, sit biă ñu lĕ sầu riêng tañ ƀiă, hơđong hăng amuñ ƀiă. Mơng anai, kual phun pla sầu riêng mơng Dak Lak amra hơmâo tơlơi gal kiăng hrưn đĭ, ba glăi tŭ yua amăng bơwih ƀong lu ƀiă dong./.