Mơguah lơ 16/9, Ding jum kơđi čar, Khul git gai ping gah dêh čar jơnum hăng đơ đam dêh čar lăi pơthâo, pơčrâo ten hăng pok pơhai ngă tui 4 mơta hră pơtrun yom hơmâo: Hră pơtrun 59 kơ bruă mut phung jar kmar; Hră pơtrun 70 kơ pơhlôm djop apui, ia jâo yua, Hră pơtrun 71 kơ bruă pơđĭ kyar  pơtô hrăm, pơtô pơjuăt; hăng Hră pơtrun 72 kơ bruă pơgang, lăng ba, pơđĭ tui tơlơi suaih pral găng añrăng kơ mơnuih ƀôn sang. Pơhiăp git gai ƀơi mông jơnum, Khua git gai ping gah ơi Tô Lâm lăi pơtong boh yom phun phara mơ̆ng tal jơnum anai, hăng lăi pơtong hơdôm pok hră pơtrun kah hăng dưi pơtruh brơi laih anun pơhrua lu hloh kơ “Pă pok hră pơtrun” yom ƀơi dêh čar.

Khua git gai ping gah ơi Tô Lâm lăi pơthâo kiăng akŏ pơjing Khul git gai mơ̆ng gơnong dlông kơ rim hră pơtrun, pok pơhai ngă tui ƀudah Khul git gai ping gah dêh čar, pô git gai mơ̆ng Gơnong dlông brơi pok pơhai ngă tui hră pơtrun Ding jum kơđi čar. Khua git gai ping gah rơkâo djop ding jum, anom bruă, tơring čar, plơi pla, rim čô khua, mơnuih apăn bruă, mơnuih ping gah khom mă bruă mơtam, ngă tui tơlơi pơtrun "pơhiăp nao hrŏm bruă mă", pô ngă khua khom glăm ba boh tơhnal ngă bruă, ƀu dưi pơjang nao rai, bĕ hĭ tơlơi soh glăi, tơlơi aka ƀu djơ̆.