Pơhiăp ƀơi mông jơnum, Khua git gai pơ ala mơnuih ƀôn sang dêh čar ơi Trần Thanh Mẫn brơi thâo, Khul pơphun Jơnum hơmâo čơkă 49 tơlơi čih hăng hơmâo tum pơƀut glăi, in pơkra jing hơdrôm hră hơdor lui. Hơdôm tơlơi pơgôp hiăp, pơčrông sai ƀơi mông jơnum hơmâo lu mơta bruă biă, hơmâo boh yôm kơ tơlơi pơtô djơ̆ hăng tơlơi hơmâo sit, lăi pơthâo dlăm 80 thun  akŏ pơdong hăng đĭ kyar mơ̆ng Anom bruă pơ ala mơnuih ƀôn sang Việt Nam.

Lu tơlơi pơgôp hiăp ba bơkơtuai ƀơi mông Jơnum lăi dlăm kơ bruă hla tui thâo pơčeh phrâo hơdôm tơlơi hơmâo kơđiăng lui amăng 80 thun rơgao, kiăng pơđĭ tui anŏ klă, tŭ yua bruă mă amăng hơdôm rơwang bruă pơ anăp, ƀơi anăp lĕ gum pơgôp klă kơ mông Jơnum ruah khua ping gah djŏp gưl hăng Jơnum ruah khua ping gah đơ đam dêh čar tal 14; prăp lui ruah khua pơ ala mơnuih ƀôn sang dêh čar tal 16, ruah Khua jơnum min pơ ala mơnuih ƀôn sang djŏp gưl rơwang thun 2026-2031; pơphun bruă ngă sit nik čơkă 80 thun - Hrơi blung a dêh čar pơphun plĕ hră ruah khua pơ ala mơnuih ƀôn sang dêh čar Việt Nam./.