Ƀơi mông jơnum, Khua mua pơ ala mơnuih ƀôn sang tơring čar Dak Lăk pơƀut bơkơtuai, pơsit brơi hră kah pơpha, pơplih glăi bruă brơi prăk tuh pơ alin man pơkra ring bruă kiăng đĭ kyar, đah mơ̆ng ngă tui hơdôm Jơlan hơdră dêh čar pơtrun rai; pơsit jao mrô mơnuih mă bruă sit nik, mrô mơnuih ngă bruă amăng kơnuk kơna thun 2025; pơplih bruă mă yua glai rưng pioh ngă hơdôm kơčăo bruă yôm phun; pơtrun tơlơi pơkă ngă bruă mơ̆ng Jơnum min pơ ala mơnuih ƀôn sang tơring čar, khul khua pơ ala, hơdôm khul grup, anom bruă, grup khua pơ ala hăng khua pơ ala mơnuih ƀôn sang tơring čar.

Ăt ƀơi mông jơnum anai mơn, Jơnum min pơ ala mơnuih ƀôn sang tơring čar Dak Lăk tal 10, rơwang thun 2021-2026 hơmâo ruah pơhrua Kơ-iăng khua jơnum min pơ ala mơnuih ƀôn sang tơring čar Dak Lăk. Hăng mrô hră plĕ ruah rơbêh kơ 86,2%, Jơnum min pơ ala mơnuih ƀôn sang tơring čar Dak Lăk pơsit ruah ơi Từ Thái Giang ngă Kơ-iăng khua pơ ala mơnuih ƀôn sang tơring čar Dak Lăk tal 10, rơwang thun 2021-2026. Pơhiăp ƀơi mông jơnum, yă Cao Thị Hòa An - Kơ-iăng khua ping gah tơring čar, Khua jơnum min pơ ala mơnuih ƀôn sang tơring čar lăi pơtŏng: tơdơi kơ rơbêh dua blan dăp glăi, pơmut hrŏm dua boh tơring čar, gong gai dua gưl ƀơ ƀrư̆ hơđong tui laih, djru ba gong gai jê̆ giăm mơnuih ƀôn sang hloh, pơsir brơi hmao tlôn hơdôm bruă glăk hơmâo./.