Tom brơi, lơ 19/8, Khua dêh čar ơi Phạm Minh Chính nao pơhmư̆ jơnum pơƀut bruă mă thun hrăm 2023-2024 hăng pok pơhai bruă mă thun hrăm phrâo 2024-2025 yua kơ Ding jum Pơtô hăng Pơjuăt pơphun tui hơdră lăng nao rai amăng tivi plah wah anih jơnum phun ƀơi Hà Nội hăng abih bang 63 boh tơring čar, ƀôn prong. Pơ ala kơ kơnuk kơna, Khua dêh čar ơi Phạm Minh Chính čih pioh, lăng yôm, bơni hăng pơpŭ kơ hơdôm boh tơhnal yôm mơ̆ng anom bruă Pơtô hăng pơjuăt dưi ngă thun hrăm laih rơgao, djru hrŏm amăng bruă pơđĭ kyar lŏn ia thun blan rơgao.

Kơ bruă mă phrâo pơ anăp, Khua dêh čar pơtrun hiăp kơ Ding jum Pơtô hăng Pơjuăt, djop ding jum, anom bruă pơdjơ̆ hrŏm, tui hluai tơlơi dưi, bruă mă mơ̆ng pô pơtum ngă tui tong ten, hmao kru, lăi pơthâo djop mơta bruă. Biă mă ñu prăp lui tong ten anŏ gêh găl pok thun hrăm phrâo; pơphun jơnum ngă yang mut thun hrăm phrâo lơ 5/9 pơ anăp, ngă hiư̆m pă jing hrơi mông mơak klă, pơtrut pơsur pran jua thun hrăm phrâo, biă mă ñu đing nao pơtô hrăm tơlơi thâo kơ ƀing nai pơtô jai hrơi rơgơi hloh, djơ̆ hăng anŏ či kiăng amăng rơnuk phrâo.