Amăng hrơi blan rơgao, tơring čar Khánh Hòa hơmâo lu anŏ pơplih tong ten amăng bruă gum hrŏm anom bơwih ƀong sĭ mơdrô, ngă gêh gal amăng pơtrut pơđĭ kyar bơwih ƀong huă-mơnuih mơnam. Ayong Lê Thanh Vân, kơ-iăng khua kông ti Miwa Vina (kual tuh tia pơkra ming Suối Dầu, să Suối Dầu) brơi thâo, anom bơwih ƀong sĭ mơdrô phrâo hơmâo khul wai lăng kual bơwih ƀong, kual tuh tia pơkra ming tơring čar Khánh Hòa djru pơplih ngă hră pơ-ar brơi tuh pơ alin pok prong sang măi tañ hloh, ngă hră pơ-ar rơngiă 5 hrơi:

“Anom bơwih ƀong sĭ mơdrô ƀing gơmơi lĕ anom bruă man ƀrô hăng anet, 100% prăk tuh pơ alin mơng tač rơngiao. Khul wai lăng ƀudah hơdôm anom bruă, sang bruă lêng kơ gum hrŏm, črâo ba djop bruă ngă pơ-ar brơi tañ hloh, lăp djơ̆ hăng tơlơi pơkă amăng tơlơi phiăn. Anai lĕ tơlơi yôm biă mă, pơhưč kiăng hơdôm anom bruă tuh pơ alin phrâo đing nao ƀiă dong”.

Bruă pơplih ngă hră pơ-ar ƀơi khul wai lăng kual bơwih ƀong huă, kual tuh tia pơkra ming tơring čar hơmâo hơdôm anom bơwih ƀong sĭ mơdrô amăng lŏn ia hăng tač rơngiao lăng yôm biă mă. Ơi Lê Hồng Phương, kơ-iăng khua khul wai lăng kual bơwih ƀong huă, kual tuh tia pơkra ming tơring čar Khánh Hòa brơi thâo, ngă hră pơ-ar pơplih brơi tuh pơ alin hơmâo tañ ƀiă mơng 10 hrơi dŏ 5 hrơi, pơ anăp anai, gir run dŏ 3 hrơi.

“Ƀing gơmơi pơhưč hơdôm anom bruă tuh pơ alin amăng kual bơwih ƀong tum pơƀut, sit biă ñu lĕ hơdôm anom bruă gưl yŭ amăng kual tuh tia pơkra ming kiăng ngă hră pơ-ar djơ̆ hăng tơlơi pơkă mơng 10 hrơi ră anai dŏ 5 hrơi, tơdah kiăng tañ hloh, ƀing gơmơi amra hrŏ trun dŏ 3 hrơi. Yôm hloh lĕ lơm anom bơwih ƀong sĭ mơdrô nô̆p hră pơ-ar, anom bruă kiăng pel ĕp hăng črâo brơi hmao tlôn kiăng anom bơwih ƀong sĭ mơdrô pơgiong, pơhrua, pơhlôm brơi hră pơ-ar ngă klă hloh”.

Tơring čar Khánh Hòa pơtrut kơtang pơđĭ kyar apui lơtrik pơkra glăi, anăp nao plai ƀiă gơnam nao apui yua mơng hơdang pơtâo, pơhlôm apui yua amăng lŏn ia hăng pơđĭ kyar bơwih ƀong mơtah, hơđong kjăp, Truh blan 6/2025, Khánh Hòa hơmâo 57 akŏ bruă apui lơtrik pơkra glăi hăng abih tih dưi pơđuăi 3.750 MW, hơmâo apui pơkra mơng angĭn, hrĭp pơ-iă yang hrơi, drai ia hăng pil hrĭp pơ-iă yang hrơi dưm hăng bơbung sang, dưi pơkra rai 7% apui yua amăng đơ đam dêh čar. Sit biă ñu, kual kơdư tơring čar pơđĭ kyar kơtang hơdôm akŏ bruă pơprong anun lĕ sang măi Nhiệt điện BOT Vân Phong 1 dưi pơđuăi 1.320 MW, pơgôp giăm 3% apui yua amăng dêh čar. Ƀơi kual Dơnung, hơdôm grup pơprong anun lĕ BIM, Trung Nam hơmâo tuh pơ alin hơdôm rơbâo klai prăk hăng amăng anih hrĭp pơ-iă yang hrơi, apui pơkra mơng angĭn pơlir hăng bruă pơkra hra hơdjă, mă yua klă lŏn krô kreñ.

Tơring čar Khánh Hòa pơsit tong apui lơtrik lĕ 1 amăng 4 tơlơi akŏ phun kiăng pơđĭ kyar, hơnong pơkă jing anih phun pơkra apui lơtrik amăng dêh čar hăng abih tih dưi pơđuăi hiam lăng 14.000 MW amăng thun 2030, hơmâo apui lơtrik hrĭp pơ-iă yang hrơi, angĭn, hyuh hăng put ayuh. Tơring čar glăk pơtrut tañ hơdôm akŏ bruă phun anun lĕ sang măi pơkra apui lơtrik ayuh Ninh Thuận, drai ia Bác Ái, LNG Cà Ná…laih dong đing nao pơgiong glông hrĕ pơđuăi, ba tơbiă hơdră bruă pơhưč tuh pơ alin, pơtrut tơlơi mut hrŏm mơng mơnuih ƀôn sang kiăng ngă tui hơnong pơkă pơđĭ kyar apui lơtrik mơtah, hơdjă, hơđong kjăp.

Ơi Hồ Xuân Ninh, Khua gơnong bruă sĭ mơdrô hăng tuh tia pơkra ming tơring čar Khánh Hòa brơi thâo, apui lơtrik yua hơđong ƀu djơ̆ kơnong pơgôp amăng pơhrui ngăn drăp đôč ôh mơ̆ ăt ngă gêh gal kiăng ƀon lan iâu pơthưr tuh pơ alin hơdôm akŏ bruă tuh tia pơkra ming phrâo:

“Kiăng ba tơbiă hơnong pơkă brơi hơdôm gơnong bruă, bruă mă dưi pơhrui lu hloh, yua boh thâo măi mok phrâo, pơhlôm wai pơgang jum dar, gơnam pơkra tui boh thâo măi mok phrâo, pơgôp đĭ tui prăk pơhrui ngăn drăp. Kual tuh tia pơkra ming anun lĕ Dốc Nắng, Trảng É, ƀudah Cà Ná 1 ăt hơmâo ruah hơdôm anom bruă tuh pơ alin amra tuh pơ alin man pơdong anih anom ha amăng plĕ, tañ hloh pơhưč lu akŏ bruă phun”.

Anih anom phun hơmâo tuh pơ alin, pơhlôm gêh gal tuh pơ alin; bruă tuh tia pơkra ming, apui lơtrik pơkra phrâo, tuai čuă ngui-tơlơi bơwih ƀong hơmâo hơkrŭ tañ lĕ tơlơi gal kiăng Khánh Hòa pơđĭ kyar bơwih ƀong huă tañ, hrưn đĭ tơlơi hơdip mơnuih ƀôn sang. Tơdơi kơ pơmut hrŏm tơring čar, pok rai anih pơđĭ kyar, Khánh Hòa tŏ tui hơnong pơkă truh thun 2030 jign plơi prong gah gơnong glông, pơđĭ kyar bơwih ƀong huă 12% ha thun, pơhrui rĭm akŏ mơnuih đĭ 14% ha thun. Ơi Trần Quốc Nam, Khua jơnum min mơnuih ƀôn sang tơring čar Khánh Hòa brơi thâo:

“Ping gah, jơnum min mơnuih ƀôn sang tơring čar pơsit, pok phư hơdôm anih gun prong amăng jơlan gah hăng anih anom, sit biă ñu lĕ hơdôm ring bruă dŏ kŏng glăi; đing nao pơđĭ kyar ha amăng plĕ bruă man pơkra jơlan glông hăng anih anom kual tuh tia pơkra ming, pơtrut pơđĭ kyar phrâo. Pơtrut pơđĭ kyar pă bơnah phun anun lĕ tuh tia pơkra ming, apui kơtrik, tuai čuă ngui-bơwih bơwang hăng plơi prong pơplih phrâo; pơtrut tañ pơplih mrô, anăp nao hơnong pơkă bơwih ƀong mrô truh 1/3 abih tih gơnam amăng thun 2030./.