Kơ-iăng khua dêh čar ơi Nguyễn Hòa Bình nao ĕp lăng 2 kơčăo bruă tuh pơ alin “Rơbâo klai prăk” anun lĕ Kơčăo bruă pơdong plơi pla mơnuih ƀôn sang Cồn Tân Lập, phường Nha Trang hăng anih pơdong plơi prong hiam Mỹ Gia phường Tây Nha Trang. Kơčăo bruă plơi pla Cồn Tân Lập hơmâo tơlơi soh glăi lơ̆m juă nua tơgŭ mă bruă, lu črăn bruă brơi pơdơi mơ̆ng sui laih. Mơnuih ƀôn sang čang rơmang kơčăo bruă anai tañ ngă giong hĭ man pơdong hơbô̆ hiam kơ ƀô̆ mơta plơi prong phrâo. Bơ kơčăo bruă pơdong plơi prong phrâo hiam Mỹ Gia ăt gun hĭ mơ̆n kơ bruă tuh pơ alin prăk kăk, djop sang bruă hơmâo tơlơi dưi hlăk nao ĕp lăng či pơtong glăi.

Đơ đam tơring čar Khánh Hòa hơmâo jơnum jăm ƀuah tơlơi soh, pô gơgrong ba phun, rơkâo pơdlông sem glăi hăng pơsir tơlơi soh, mă glăi prăk kăk ngă rơngiă soh sel truh 1.100 klai. Khă tui anun, lơ̆m hlăk pơsir kơđi tơlơi soh glăi bưp hĭ tơlơi gun, tơnap tap yua kơ hơdôm kơčăo bruă juă nua tơgŭ mă bruă blung a, ruah sang bruă tuh pơ alin mă bruă ƀu găl. Kơ-iăng khua dêh čar ơi Nguyễn Hòa Bình lăi pơtong, jơlan hơdră mơ̆ng Kơnuk kơna brơi pơtum khom pơsir hĭ tơlơi tơnap tap, anŏ ngă gun sui thun blan, anăm lui huač soh sel prăk kăk, pran jua mơnuih mơnam laih anun pơjing pran kơtang pơtrut pơđĭ kyar:

 “Mơ̆ng tơlơi hrăm bruă laih găn rơgao mơ̆ng hlâo pơsir tơlơi tơnap tap tui Hră pơtrun mrô 170, lu tơring čar, amăng anun hơmâo Khánh Hòa wơ̆t hăng Khánh Hòa hơđăp, Ninh Thuận hơđăp, ƀing ta ăt dŏ hơmâo lu kơčăo bruă pơkŏn ăt pơsir hĭ tơlơi dŏ gun, kiăng pơtum pơsir hĭ. Tơdah, pioh dŏ kơđông na nao huăč prăk kăk, pran jua mơnuih mơnam soh sel. Dua dơ̆ng lĕ, rơngiă hrơi mông laih anun kơđông hĭ, mơnuih ƀôn sang ƀu mơak ôh”.

Bruă tuh tia pơkra ming hăng măi mok laih anun apui yua lĕ 2 amăng 4 bruă mă phun pơtrut pơđĭ kyar, dưi lăi pơthâo amăng hră pơtrun Ping gah tơring čar Khánh Hòa. Ră anai, đơ đam tơring čar hơmâo 33 boh ƀut ngă anih tuh tia pơkra ming hăng măi, hơmâo pơkă hlâo, abih bang đơ đam lŏn či pơdong lĕ 1.400 ha. Gah apui yua, ia jâo, tơring čar brơi pơkă anih hơmâo 60 kơčăo bruă hăng jua kơtang man pơdong sang măi apui lơtrik lĕ 8.525 MW.

Ơi Hồ Xuân Ninh, Khua Gơnong bruă Tuh tia pơkra ming hăng sĭ mơdrô tơring čar Khánh Hòa brơi thâo, hăng bruă brơi jŭ yap glăi, laih anun iâu pơthưr tuh pơ alin, tơring čar hơmâo ngă atur pioh kơ bruă tuh tia pơkra ming hăng apui yua jing dua bruă mă phun kah hăng tơmeh gơgrong ba amăng bruă pơtrut pơđĭ kyar, djru kiăng tơlơi bơwih ƀong huă ƀơi tơring čar hrưn đĭ kơtang hloh amăng čăl phrâo.

 “Tơring čar Khánh Hòa hlăk pơtum pơsir hĭ tơlơi dŏ gun, biă mă ñu amăng bruă tuh tia pơkra ming hăng apui yua, hơmâo pơsir ƀiă abih laih. Kơnong dŏ ƀiă kơčăo bruă đôč, Gơnong bruă Tuh tia pơkra ming hăng sĭ mơdrô amra djru lăi pơthâo jơnum min mơnuih ƀôn sang tơring čar pơsir tañ, kiăng ngă hluai hĭ bruă či ngă hăng ba kơčăo bruă anai tañ pơgôp hrŏm pơtrut pơđĭ kyar. Lơ̆m dua boh tơring čar Ninh Thuận hăng Khánh Hòa pơmut glăi jing sa, hơdôm kơčăo bruă kiăng jŭ yap glăi, pơhrua nao laih anun pơtong rơđah tui atur tơlơi phiăn pơkă pioh pok pơhai gêh găl amuñ či ngă bruă”.

Pơčrong sai hơdră pơsir hĭ anŏ kơđông, ngă gun, kiăng ba bruă tuh tia pơkra ming hăng apui yua jing 2 tơmeh phun anŏ gơgrong pơđĭ kyar, Jơnum min mơnuih ƀôn sang tơring čar Khánh Hòa pơtrun hiăp djop gơnong bruă, sang bruă sem glăi, jŭ yap djop djel hơdôm tơlơi pơdjơ̆ nao, kah hăng bruă ngă hră pơar, jơlan glông, atur sang bruă, anih duh glăi lơ̆m čuk pơdăo; laih dơ̆ng pơtong rơđah bruă mă đing nao hlaoa hơgĕt, pơpha bruă mă hăng sem glăi abih bang kơčăo bruă dưi pơphun bruă mă ba glăi rơnoh yom kiăng pok pơhai ngă tui. Djop sang bruă khom pơsir khut khăt ngă gêh găl kơ bruă tuh pơ alin, prăp lui hlâo hơdră djru ba tong ten, laih anun ăt khom gơgrong ba, glăm ba bruă pơsir hĭ tơlơi gun, tơnap tap kơ sang bruă, mơnuih ngă bruă mơdrô, sang bruă tuh pơ alin kơ bruă sĭ mơdrô.