Pơlir kông ti TNHH Mặt trời Phú Quốc hăng kông ti TNHH Mặt trời Hạ Long hơmâo jao pok pơhai akŏ bruă plơi prong phrâo Đầm Môn hăng kual plơi prong phrâo Tu Bông hăng abih tih prăk tuh pơ alin rơbêh 65.300 klai prăk. Dua akŏ bruă anai hơmâo sang dŏ, sĭ mơdrô, tuai čuă ngui, pơtô pơjuăt, ia jrao, kyâo pơtâo, đang bơnga hăng anih anom ha amăng plĕ.

Amăng thun blan mă bruă lĕ 50 thun dong mơng hrơi jao lŏn; him lăng man pơdong mơng thun 2025 hăng pơgiong amăng thun 2034. Ơi Trần Minh Chiến, Khua khul wai lăng kual bơwih ƀong huă hăng hơdôm kual tuh tia pơkra jing tơring čar Khánh Hòa brơi thâo, dua akŏ bruă anai amra pơgôp ba kual bơwih ƀong Vân Phong jing anih phun amăng bơwih bơwang, sĭ mơdrô, tuai čuă ngui, laih dong ngă tui hơdră phara mơ̆ Khua pơ ala mơnuih ƀôn sang dêh čar brơi kơ Khánh Hòa.