Mơmŏt (10/9), Khua dêh čar ơi Phạm Minh Chính, Khua khul git gai Kơnuk kơna hơdôm ring bruă, akŏ bruă phun dêh čar, gơnong bruă jơlan glông git gai mông jơnum tal 20. Mông jơnum pơphun lăng nao rai mơng ataih hăng 27 boh ƀon lan. Truh ră anai đơ đam dêh čar hơmâo 2.476 km jơlan rơdêh đuăi hmar. Ding jum man pơdong hăng hơdôm boh ƀon lan glăk gir run pok pơhai čuk pơkra 733 km dŏ glăi 22 akŏ bruă. Amăng mông jơnum, pơ ala hơdôm ƀon lan, anom bruă čuk pơkra lăi kơ bruă dưm dăp gong gai 2 gưl bơdjơ̆ nao bruă pơhrui lŏn mơnai, jao trun prăk tuh pơ alin hơdôm akŏ bruă; pơdah tơlơi gir run pơtrut tañ ngă tui…laih dong brơi thâo sa, dua akŏ bruă kiăng pơphun ngă lu biă mă lơm glăk amăng bơyan hơjan hlim, bơdjơ̆ nao bruă pok pơhai.

Đĭ pơhiăp amăng mông jơnum, Khua dêh čar ơi Phạm Minh Chính lăi pơtong, hơnong pơkă gir run đĭ tui tañ samơ̆ kiăng hơđong kjăp, amăng anun, bruă jao prăk tuh pơ alin lĕ sa tơlơi pơtrut pơđĭ kyar. Djop ding jum, gơnong bruă, ƀon lan hăng pran jua “hơdeč hmar, abih pran” ƀiă dong, pơtrut tañ bruă pok pơhai hơdôm akŏ bruă phun. Khua dêh čar rơkâo ngă tui khut khăt hơdôm tơlơi črâo trun amăng kah gưl, jao bruă “gong gai pơsit, ƀon lan ngă, ƀon lan glăm ba”. Khua dêh čar rơkâo kiăng gir run pok pơhai hơdôm bruă jao kiăng pơgiong djơ̆ hrơi mông hơdôm akŏ bruă, hăng hơnong pơkă 3.000 km jơlan rơdêh đuăi hmar hăng 1.700 km jơlan ter hang ia rơsĭ; pơhlôm pơgiong tơdron rơdêh por jar kmar Long Thành amăng thun 2025. Khua dêh čar ăt pơtă, hơdôm anom bruă tuh pơ alin pơhlôm klă hơdôm ring bruă, pơhlôm agaih rơnăk, mă bruă rơnuk rơnua djơ̆ tơlơi pơkă.