Đĭ pơhiăp amăng mông jơnum, Khua dêh čar ơi Phạm Minh Chính pơsit tong, kual Dap kơdư lĕ kual yôm phun amăng bơwih ƀong huă, kơđi čar, pơgang rơnuk rơnua, hơđong hăng kual hơmâo lu glai rưng amăng lŏn ia. Ping gah, Kơnuk kơna, ƀing khua git gai Ping gah djop rơnuk lêng kơ đing nao hloh kơ bruă pơđĭ kyar hăng hơđong amăng kual Dap kơdư; hơmâo lu tơlơi pơtrun, tơlơi klah čun, giăm anai lĕ tơlơi pơtrun mrô 23 mơng Ding jum kơđi čar kơ “Jơlan gah pơđĭ kyar bơwih ƀong huă-mơnuih mơnam hăng pơgang rơnuk rơnua, hơđong amăng kual Dap kơdư truh thun 2030, anăp nao truh thun 2045”.

Hăng pran jua “Đơ đam dêh čar yua kơ kual Dap kơdư: Kual Dap kơdư găn rơgao tơnap tap hrŏm hăng đơ đam dêh čar”, Khua dêh čar čang rơmang hăng đăo gơnang, Ping gah, gong gai, ling tơhan hăng mơnuih ƀôn sang hơdôm boh tơring čar kual Dap kơdư, ngă tui pran jua gơgrong phrâo, tơlơi pơtrut phrâo găn rơgao tơnap tap, tơlơi lông, yak nao kơtang ƀiă dong amăng pơđĭ kyar bơwih ƀong huă-mơnuih mơnam, ngă atur kiăng ngă truh kih bruă jao wai pơgang rơnuk rơnua, hơđong pơ anăp dong.