Hăng gru grua hing ang, hăng pran kơtang laih dong tơlơi đăo gơnang nao sa anom bruă pôr pơhing phun găn rơgao 80 thun akŏ pơjing, prong kơtang, Khua dêh čar ơi Phạm Minh Chính brơi thâo, gong phun jua pơhiăp dêh čar Việt Nam kiăng tŏ tui gir run, pơplih ƀiă dong amăng tơlơi pơmĭn hăng bruă mă, pơtrut kơtang, hrưn đĭ tŭ yua djop mơta bruă djă pioh gru grua, tŏ tui bruă mă, tơlơi hing ang mơ̆ djop rơnuk hlâo anun pioh glăi hăng pran jua anom pôr pơhing ngă hơkrŭ “pơsơi amăng gai čih, apui amăng hơtai boh”, pơgôp lu ƀiă dong amăng bruă pơjing, pơđĭ kyar lŏn ia hăng wai pơgang lŏn ia.

Khua dêh čar rơkâo Gong phun jua pơhiăp dêh čar tŏ tui pơplih tơlơi pơmĭn, bruă mă, đing nao ngă klă hloh, tŭ yua, ngă tui klă ƀiă dong bruă jao pôr pơhing hăng jơlan gah 30 boh hră “Gru grua, tơpă sit, lăp djơ̆-Gơgrong, hơdeč hmar, pơčeh phrâo-Gum hrŏm, abih pran, gơgrong hloh-Yôm phara, boh thâo phrâo, pơplih phrâo-Khut khăt, hmao tlôn, tŭ yua”. Ƀrô tal anai, Khua dêh čar ƀơk Gong phun jua pơhiăp dêh čar Việt Nam 16 boh hră “Khin hơtai-tơpă sit-djop mơta-hmao tlôn-gru grua-yua boh thâo phrâo-pơčeh phrâo-tŭ yua”.