Khua dêh čar hok mơ-ak lơm Khua ding jum hrŏm hăng 19 anom bơwih ƀong sĭ mơdrô pơprong mơng UAE amăng bruă logistics, apui lơtrik, mă hơdang pơtâo, mơnong ƀong huă, keh prăk tuh pơ alin, prăk kak, sang bruă prăk… rai čuă dêh čar Việt Nam. Anai lĕ hrơi mông gêh gal kiăng anom bơwih ƀong sĭ mơdrô dua bơnah ĕp hơdôm tơlơi gal ngă hrŏm amăng hơdôm bruă mơ̆ dua bơnah đing nao. Khua dêh čar lăng yôm hơdôm tơlơi gir run hăng tơlơi yak nao mơ̆ dua bơnah dưi ngă amăng bơkơtuai tơlơi pơkôl bơwih ƀong huă djop mơta Việt Nam-UAE.

Kiăng pơtrut kơtang ƀiă dong bruă ngă hrŏm dua bơnah, Khua dêh čar rơkâo dua bơnah kơtưn pơbưp nao rai khua mua djop gưl, sit biă ñu khua mua pơprong; ngă gêh gal, pơtrut pơsur hơdôm anom bơwih ƀong sĭ mơdrô dua bơnah ngă hrŏm, tuh pơ alin, kơsem min, sem lăng bruă trun mă jia hăng sa, dua gơnam tam kiăng tŏ tui hơdôm tơlơi gal dưi pơhrua nao rai mơng dua bơnah; tañ ngă pơgiong hơdôm hơnong pơkă ba rơnoh sĭ mơdrô dua bơnah đĭ 10 klai đôlar Mi.