Pơhiăp amăng mông jơnum, Khua dêh čar ta ơi Phạm Minh Chính brơi thâo, phrâo tom adih anai, Gong gai dêh čar hmâo pơsit tơhnal ba tơbiă pơđĭ kyar GDP thun 2025 mơ̆ng 8,3-8,5% hăng pran jua đĭ kyar tañ, đĭ kyar dlông samơ̆ khom kơjăp; amăng anun pơđĭ kyar bôh thâo phrâo, pơplih phrâo pơčeh phrâo, pơplih mrô lĕ sa jơlan nao yôm.

Khua dêh čar rơkâo pơsit rơđah hơdôm bruă jao hăng gơnam rơđah mơ̆ng hơdôm ding jum, gơnong bruă, tơring čar amăng blan 7, 3 blan tal 3 hăng hơdôm blan rơnuč thun. Amăng anun, ruah rim tơlơi pơdŏng pơjing anăn păn mrô, biă ñu anăn păn mrô gah wai lăng lŏn drŏn. Khua dêh čar jao kơ Ding jum prăk kah pơpha djop ngăn drăp kơnuk kơna pơhlôm prăk mă yua hăng mơnuih mă bruă ngă tui truh kih hơdôm jơlan hơdră, kơčăo bruă, akô̆ bruă; amăng anun, khom tuh pơplai djơ̆ rơnoh, ba glăi bôh tơhnal, djơ̆ phun than./.