Mơguah lơ 9/9, Khua dêh čar ta ơi Phạm Minh Chính, Khua Grŭp bơwih ƀong mơnuih mơnam Jơnum khua pơ ala đơ đam dêh čar tal 14 mơ̆ng Ping gah (Grŭp bơwih ƀong mơnuih mơnam) git gai mông jơnum tui tơđar Gong gai dêh čar hăng Grŭp bơwih ƀong mơnuih mơnam kiăng gum pơhiăp kơ hră čih pơkra Hră lăi pơthâo glăi pơsit 5 thun ngă tui Bruă pơđĭ kyar bơwih ƀong – mơnuih mơnam 10 thun 2021-2030, Jơlan gah, bruă jao pơđĭ kyar bơwih ƀong – mơnuih mơnam 5 thun 2026-2030.

Klah čun mông jơnum, Khua dêh čar ta ơi Phạm Minh Chính djă pioh, pơsit yôm hơdôm tơlơi gum pơhiăp tơpă sit, bôh thâo, bruă gơgrong mơ̆ng ƀing ding kơna Grŭp hăng ƀing khua pơ ala nao pơhmư̆; rơkâo Grŭp Dap hơdră tơpă ară kơsem min, tŭ mă tơlơi gum pơhiăp mơ̆ng ƀing ding kơna mơ̆ng grŭp, tañ ngă giong bruă čih pơkra Hră lăi pơthâo glăi. Khua dêh čar ta pơtă tơhnal pơkă ƀu pơplih samơ̆ khom pơhrua nao hơdôm bruă jao, jơlan gah pơplih pioh pơjing hơdôm pran pơtrut phrâo, pran phrâo kơ rơwang 2026-2030 pioh ngă giong tơhnal pơkă truh thun 2030 lĕ dêh čar glăk đĭ kyar hmâo măi mok rơnuk phrâo, prăk pơhrui glăi hơnong ñu lu./.