Tŭ ư hăng tơlơi jak iâu mơng Khua dêh čar ơi Phạm Minh Chính, Khua dêh čar Australia Anthony Albanese amra rai čuă sit nik Việt Nam dong mơng lơ 3-4/6/2023. Anai lĕ tal rai čuă Việt Nam sit nik blung a mơng ơi Anthony Albanese lơ̆m ñu ngă Khua dêh čar Australia. Việt Nam hăng Australia hơmâo akŏ pơjing tơlơi rô nao rai pơtom hiăp sui 50 thun laih, amăng blan 2/1973. Găn rơgao 50 thun, tơlơi rô nao rai kơplah wah dua boh dêh čar hơmâo pơđĭ kyar kơtang, sit biă ñu lĕ dong mơng hrơi jing dêh čar ngă hrŏm yôm phăn sui 5 thun laih.

Hrơi rai čuă Việt Nam tal anai mơng Khua dêh čar Australia ơi Anthony Albanese lĕ tal rai čuă sit nik Việt Nam blung a lơm ñu đĭ ngă Khua dêh čar Australia hăng anai lĕ tal rai čuă sit nik Việt Nam tal 3 mơng sa čô khua dêh čar Australia. Khua anih jưh pơ ala Việt Nam ƀơi Australia Nguyễn Tất Thành pơsit tong, tal rai čuă anai brơi ƀuh gong gai Ping gah mơnuih mơnam mơng Khua dêh čar Albanese lăng yôm biă mă hăng čang rơmang pơtrut tơlơi rô nao rai hăng Việt Nam.