Lăi nao kơ hơdôm bruă jao, jơlan pơsir truh kơ thun 2025, Khua git gai Ping gah, Khua mir sir dêh čar ta ơi Tô Lâm rơkâo Ping gah Khul ling tơhan dêh čar, Ding jum Khul ling tơhan đing nao ngă tui klă bruă pơphô bruă mă hăng Ping gah, Kơnuk kơna gah bruă tơhan, pơgang lŏn ia; gơgrong hlâo tañ pơđĭ dlông bôh thâo kơsem min, pơkă lăng hlâo, hmâo hơdră pơsir hơdeč, ba glăi bôh tơhnal hơdôm tơlơi amra truh, ƀu pioh hmâo kah mơ̆ng pơgăn. Gum hrŏm pok pơhai ba glăi bôh tơhnal Tơlơi pơtrun pơsit Ping gah 8 tal 13 kơ Bruă pơgang Lŏn ia amăng rơnuk phrâo; hơdôm bruă mă, akô̆ bruă, rơwang bruă, glông bruă tơlơi phiăn gah bruă tơhan, pơgang lŏn ia.

Gơgrong hlâo kơsem min, ba tơbiă mă yua hơdôm hơdră pơtrun, hơdră bruă, tơlơi phiăn kơ bruă tơhan, pơgang lŏn ia, djơ̆ bruă jao pơgang Lŏn ia wot ƀơi anăp hăng sui thun. Khua git gai Ping gah, Khua mir sir dêh čar ta ơi Tô Lâm lăi rơđah tơlơi pơhing abih bang ling tơhan khom lăi pơthâo dơlăm hloh dong bruă ngă tui jơlan gah abih bang mơnuih ƀôn sang pơgang lŏn ia, mơnuih ƀôn sang kơdŏng blah, pơgang Lŏn ia amăng rơnuk phrâo, hăng tơlơi pơmin kơnang kơ mơnuih ƀôn sang “mơnuih ƀôn sang jing phun akha”, jing akô̆ phun, jing pô; pơđĭ dlông bôh tơhnal mă yua, ba glăi bôh tơhnal wai lăng kơnuk kơna gah pơgang lŏn ia ƀơi abih bang hơdôm gưl./.